من قديمــــه
سميت باسمك يا لاه الأكبر =سبحان ما يخفى عليك الخافي
يا خالق الإنسان بإحسن مظهر =وأنت الكريم إللي بجاهك ضافي
عسى بجودك والنعم نتشكر=كل من شكر تعطيه رزقه وافي
ومن كفر في ما نزل واتجبّر= يورد جهنم تلهفه لـهـّافـي
يا محيي القفر الجديب الأغبر=اسألك تغفر زلّتي واخْلافي
و أسألك في الدنيا بخيرً نظفر =من قبل مندرنا على الأكتافِ
وأزكى تحية ع النبي تـتكرر=طه محمد طيـب الأعرافِ
يا من عطاه الله نهر الكوثـر=في جنة الفردوس نبعه شافي
عسى الشفاعة ذخرنا في المحشر =ياصاحب الحوض الهني الصافي
من بعد يالهاجس أشتد و أتعصّر=و أبدع بقافي ما مثيلة قافي
أبلج من البحر الغزير الأحمر=قم لحفه مثل البناء لحّافي
يا حول براقة بمنشى يدهر=والسيل من فوق القسم زعّافي
العرض حراثة مسى يتجوّر =ملقي ظمر ما تحمل الأردافي
كل حين عامحرا يوقع مكسر=والصيح ثاير يا صمد يا كافي
كمن مطيرة هانية تتجدّر=مرّت بها عدت سنين أعجافي
بعد العكيمي ذبرها قد غبّر=و أمست خلية ما بها متعافي
بارت صروع الحضرمي في البندر =مسكين حبة قد دفنه السافي
هبت على الاحقاف ريحٌ صرصر =لي نقـفـت خربانهـم نقّافي
واليوم با نفتي شـيوخ الأزهر=حجة نبا فيها الجواب الشافي
وش قولكم في من ضري عالمنكر =يقــطع في الخضرا ولاله كافي
وأندر على مثوى ولالة مندر =لاشي معـه حجـة ولا حـــلّافي
يوكل على الصدقة ومال الـقُصّر =والأعظم المستور لي هـو خـافي
يا غبن حالي عالظرف والمذخر =زبن القبيلي لاضـوا مخــتافي
ويا غبن حالي عاصلاب المنحر=كمن قـطـيرة وردوهـا الصافي
ويا غبن حالي عامحافل تذكر=وأمجاد لي من سابقات أسـلافي
ويا غبن حالي عالجمال الفُطّر =لي تنقل الثقــلات و الاردافي
ويا معتني قم في عجل و تيَّسر =وألقـف منحي لابلد الاحقـافي
قم شد لي مهري عريب مضمّر =عاده ثني ومكمل الاوصــافي
يسبق هبوب الريح لا قد دبر=ويقصي مطارح مبعدات اشوافي
واعزم قبيل الفجر ضوة يظهر=واقـصد رجالٍ كاملين اشـنافي
لي يكرمون الضيف سنح المضطر =زبن المجنى عــزوة المختافي
سـّير على دور المعـزة بالمـــر=وابلغ ســــــلامي للمعارف وافي
سلام ما يحصى و لا يتكـــرر =يا فزعتي يوم النكــف والحــافي
وانشـد على شعارها واتخبر =ذي يحكمــــون القارعة والقافي
وقلهم رعـــد الحيا يتهدّر =عالحظــر والبدوان خــــيله ضافي
با ترعضون السيل من حيد أزْوَر =تصبـــح مـــدنة بالثمــــار اصنافي
و اختامها بالمصطفى لي بشّر=طه محمـــد طيب الاعـــــــرافي