ديوانية شهد الملكه لأعذب الأشعار الشعبيه الحضرميه .

[شهد الملكه]

محاوره شعريّه جمعت كلا من : -
الشاعر / صالح أحمد محمد باقديم .
والشاعر / أحمد محمد سالم باقديم .
والشاعر / سالم محمد سالم باقديم .

بدع الشاعر / صالح أحمد محمد باقديم : -

شل سلامي معك لأهل الوطن يالمسافر = للذي في الخطم وأهل القُرى والمدينه
قل لهم ما على صالح في البُعد قاصر = نحمد الله ذي سيّر لنوح السفينه
إنّماء الشوق ملقي صوب في الجوف نافر = منّه القلب طول الليل يردف ونينه
با نسايره والدنيا عبر قال شاعر = والتجارب يخذها الآدمي من سنينه

جواب الشاعر / أحمد محمد سالم باقديم : -

قال بقديم تعجبني ردود الميازر = من تساريح رميان الحصون الزبينه
رُد سلامي عليهم عدّ ما صبّ ماطر = وإرتوى الزرع منّه والسُمر والضبينه
حرّركوا عاصفه من شوق عند المهاجر = للوطن ذي عليه البار قاعه وطينه
لي محلّه ومسقط راس به باتفاخر = يوم ما يظهر الصيني ويفخر بصينه
فيه وديان مشهوره لها روع بادر = في الحضارات ما هي مشترى أو رهينه
ورث عن ورث والميراث عنده مآثر = شاهده بالحضاره للأسد في عرينه
ودّي إلاّ سري مسرى على خطّ صافر = صبّح القطن غبشه بالهدوء والسكينه
وأحرف العين في الوديان صاعد وحادر = من مشاريف وادي عمد ملاّ كنينه
منظر الأرض لي ربّت جمال المعاصر = تنقل العلو فوق المثقله والرزينه
نسال الله يرحم عودهم والمثامر = رحمة الخير تكسي ريفهم والمدينه

جواب الشاعر / سالم محمد سالم باقديم : -

مرحبا بالكلم من بحر بالموج زاخر = فيه بتشوف حبّ اللول عا كُل عينه
نهر مجراه ما كف دوب عا طول سابر = ما تحرّكه آله أو تضخّه مكينه
هاش راسي إذا سمعته حنين المناجر = يخرج العود من آلته تُحفه ثمينه
للوطن شوق يعصف قال سالم وثائر = لا طراء ذكر عا قلبي حصاته وطينه