بوربيع في شبواني زواج في الحوطه عند بن حمدون

 

صالح ربيع

عالم ومتعلم ويقراء في المصاحف والختام
يومه عصر باكر في البلده صرب بَّره ودام
وان جاء طريق اللوم خلَّه ما على الشاعر ملام
كل من بلي يصبر على كل ما يقع له والسلام
ماشي من الوادي يسر بقعه تصيبك بالهيام
له سبع راعات الذي دخَّل جعيمه في نعام
والمغرب اذن والعشاء اذن وخلق الله صيام
نبوَّ على الغرفه وعابابكر واللي في الخيام
حمدون واولاده رجل عبر ومن الناس الفهام
وأحمد زعيم الدار بعطيه الف ديته والوسام
سقيتهم شاهي لبن وهم سقونا خل سام

 

يا مرحبا بقوال من شاعر يزر الخاتمه
من عند كربان الاسد لي هو قواله دايمه
حاشاء وكلاَّ كان ود عيضه يجي في اللائمه
وان بايعادينا وشي له مصلحه باسالمه
وان بايهاجمنا بلا دعوه علي باهاجمه
ما سيب جيش الباديه كله سبب باناعمه
علوي كما علوان قوته ما يفطر صايمه
والتاليه باقولها عاد الخيام أمخيمه
والليله الدنياء نويره والعرب متفاهمه
في شان بن حمدون بازر الحبال الناسمه
والعفو يالجمهور شو عندي قنابل سامه

مبدأ بوربيع

الليل ظلمه والشموس الظالمه طول النهار
لما متى ياابن اليمن في حرحرة والوقت حار
من حيد قاسم لا عدن وجبالها تقبس شرار
جالولها دغشه سقل لعبو بها لعبه قمار
طعنو مطيتهم وزقلو بالحقيبه والشوار
ولعاد حاجه للنواير غير ما قد صار صار
لي ما درو بسرارها خلوه شل عفشه وسار
أوصى النبي بالجار حتى لو وقع يا خس جار
واجري قفاهم كلما قفزته غار قالو عاد غار
تراحمو قل للتجر شو عاد ذي جنه ونار
هذا جزانا يوم تابعنا سنانيك الخصار
بارح تلولا ليله الجمعه طفوها أربع مرار
وان بقيت الحاله كذا يأبن اليمن خزوه وعار
حبَّه بميت ريال كل منهم سارق وضار
من جاب له عشرين مليون أشترى ارضيه ودار
راحوا من اليمن الحبيب اللي يزرون الوتار
كل البلد سقطت وهي فازت نهار الانتصار
وان شي جرى فينا وفيهم هو من الله اختبار
من بايصلح دار مثلك أو يبطل في الديار
لا حد ذرع عرضك وطولك بايقع تسعين وار
سلام بالمليون لا مرة ولا اربع مرار
ما هو شوي حمدون واولاده من الناس الكبار
هذه السنة كذها ثلاث اسنين نرغي في الحصار
ولقا لها اربع سدد لما تقوين الجدار
يستاهل التقدير والعز والشرف والاعتبار
وحمولهم جاء  في المراكب وشي جاء في القطار
والطايرات اربع سعوديات معهم في المطار
للامر بيدي بطرحه في ذي الأراضي مستشار
مبروك لك مليون مرَّه بالفرح والازدهار
سافرت ورجعت تخب كله على شان الشعار
من يوم طش ابنه وهو بين السماء والأرض فار
جالو لها بن عون واعوانه كلو لي في الزيار

 

ب س بسم الله خالق ليلها ونهارها
وسموم مثل النار تشوي الدود لي في جحارها
عسى بحق طه محمد يبعدون اشرارها
كانت سمانا صافيه بنجومها وأقمارها
واحنا غبو تر يوم ولينا الزقور أشوارها
وبعد ذا قفوا وخلو علوها في صارها
والدق وقع فينا وفي لي ما درو بسرارها
ريت امنا بلقيس تتنازل وترضي جارها
غارة ورى غارة ومن حصل بهيمه غارها
لا أمن لا استقرار والاسعار تلهب نارها
كل شي غلي في شبام حتى لحمها وخصارها
والكهربه ترشن وتطغي عوجو مسمارها
وشركة الماء يوم سبرت زيدو في اسعارها
وأهل الصيادل في دواهم زيدو في اضرارها
لا في الريال اليمني بركه ولا في ريالها
يالله بحسن الخاتمه ما زرزرو عا أوتارها
سلام عالعوجاء جفل هي وأهلها وأنصارها
فيها اخوالي وأخوتي هم بلغونا اخبارها
وسلام لك يا دار رافع فوق فوق اديارها
دار الكرم والجود منك أشرقت أنوارها
وسلام لأهل الموجبه اسادها ونمارها
مساكم الله بالرضاء لا ياكبار اكبارها
لو ما أجتهد حمدون كانه ما أفتك أحصارها
قوى سواعدها وسوس ساسها وجدارها
سالم صليب الراس حط حراس في معبارها
من داخل الطائف يقود القافله وقطارها
أنت أرضها قولو لسالم والسماء وأمطارها
غن ياحمد والدك حط الليم في عشارها
الله يبارك لك شجارك دندنت بزهارها
كله على شانك ضوو من كل محل شعارها
سلامكم مخصوص من شاعر يسن أشفارها
قفي وخلا تمرها وطعامها في ازيارها