ما هو شوي بوزيد من أهل الوفاء والاعتدال
لجل السلى كافح وناضل في الوسائل والوسال
لي ما درو حسبوه في حوطه حمد بن زين حال
كل من قدم عابوه خطوه يعتبر مخطي وزال
أنا الوحيد اللي سقونا خل ولا عندي خلال
أنه فرس وانه حمار يقدمونه عالجمال
علوي ظهر نفسه وبت والشعب عايش في خيال
ان وافقتك الحزم والا حل حوالي باعلال
ما من كماك الا نقول الجور وايد والبطال
وحمو لكم من كل عينه من حطيطات الدقال
نقول للسواح مرتاحين وأحنا في نكال

يا مرحباء بقوال من شاعر تصلح وأعتدل
ضحى براس المال في حزمه بلاده والوسل
وعطوه رتبه عاليه طرحوه في خيره محل
ذلا الا بادباه خلو سعد عامسعود زل
صماً وبكماً ما يعرفون الصحيح من الخلل
الله ينصف في ال جمال لعبو بالجمل
ما صدق عيوني بل شوفه حقيقه أو خيل
مالك ومال البنت يابوزيد خليك الزعل
يا خير والله شغل سويته ولاكنه بطل
يا خميس بن يسلم بناديرك على راس الدقل
والتاليه باقولها دائم ونحنا في نكل

بعد الرخاء والعز قذ هلا معرض للهلاك
يوم الرقابة فالته كل من لحق محواك حاك
لا جبت له فتوه كما ذيَّه صغيره ما فتاك
الله يعزك يالتراث أرجعت ترجع على وراك
ولعاد حد في لرض من ليهم يديرون الفلاك
والكذب والغش والخيانة عندهم كل شي سلاك
له ما يشوف الخير لي بدَّل سلوك الاشتراك
ولا عطيته ما معك دحرجك في حفره وهاك
نصبوا على وعل الجبل يالي تنصبون الشباك
لوصلت عند الباب جاء البواب ردك عاقفاك
صحنا من البركان لهبت نار في نجم السماك
تلصى ربع في اليوم وفواتيرها تحرق شواك
طفو سيريكم وأضربو يأهل المطاحن والحناك
انك تباء معنا رحب والا تقلَّع ما نباك
الله بايخلف ظنونه كل من هو فيك شاك
حررتنا من ظلم لستعار وأذناب الملاك
والعالم العربي وحتى الشرق والمغرب معاك
الصرف يتدهور علينا وأنت تمشي عاملاك
باحارثه مبسوط والدق في المساكين الركاك
والشاعر الشعبي وما يملكه وأولاده فداك
نبيت عالجمهور وانته يا معلم ذا نباك
انتم ثلاتعشر نفر واحنا ثلاثين الف لاك
شف صالح ربيع وهو مزرور لا دارك اتاك
تقول في وادي مدر تبرق وترعد في سماك
ما هي كما بعض ا لبلد تنكرك حتى في كراك
ودخونها عودي وند ما هو كرب يابس وراك
لاجيتها وانت مريض بلا دواء ربك شفاك
تاتي رسايلهم من الخارج إليك بلا دراك
بعد الضماء سالت شعوبك والمطر برد ظماك
منذو ثمانتعشر سنه مبعد راءت عين كماك
الله يبارك في خطاكم يا رجال الاحتراك
وأما ال باعصره ورادي قالو المطلع شراك
ودجاجه العمري على بيضه تظلي كاك كاك
مالك ومال الناس في كل الأمور الله يراك
من داخل الغناء ومن دوعن يسمعون الدكاك
مقدرت نحصيهن ملانه لرض مرة والعراك
لا قلت له حياء صباحك قال لك حياء مساك
واحنا معك والله يكدر كل من كدَّر صفاك
الله مصلي عالنبي تستاهل أكثر من شقاك
ما نقدر انجازيك يا يسلم على المولى جزاك
لعضام لي وانته نفترس في المتنن هن والوراك
مادام عاد البر غالي خل صبوحك من عشاك
خل رايناء واحد وبطَّل في شراكه شركاك

ب س بسم الله يا أهل الله شو الشعب أهتلك
ولعاد ابو واحد على أهل الشعر والكادح حك
من شل عصاته قال شاعر وان عصب حبله فتك
وان جيت بااعمل على حاشي إلى تحمل برك
والشاذري والشيخ بادباه ما منهم فلك
قطعو مسالكنا وسابونا مقاطيع السلك
زاد اللعب والنهب في الشركة وكلين اشترك
لا حاك واحد طلع أعصابك إلا متقول هك
والتليفون يصيح حد شابك وحد مبعد شبك
لو ما معك تركه كما فلهوم ما حد يعرفك
كل حوت يوكل حوت في الوادي تقول الا سمك
والكهرباء راعه مقيمه كلها شغله لوك
باراجع المسئول قال أول سرح لقلك حنك
صحيت في صيحت قالو ليه تصيح ايش بك
يا بو حمد انته لها وأنت الأمل من دون شك
يا صانع الوحدة لنا الأمر والتصريف لك
كل ما تقوله قوله كل الشعب والمولى معك
وان شي خلل عندك بسيط انته بشر منته ملك
ريالها ورجالها ركوا ونص في الشعب رك
وسر في الطريق الجادة واسمع نصيحة والدك
ذلا نصيحة قلتها والله لانا معاتبك
المؤتمر امي وابي يالمنفصل مالي ولك
والتاليه يابو علي سمَّع وكبر همتك
قوته محن وذنوب وانته اللحم عندك والسمك
سلام مني عابلد من كل حق ما تنكرك
حوطه حمد بن زين تضرب لك سلام وتشكرك
أرض المعزه والشرف في كل مجال أتشرفك
فيها فلان فلان عد به من سريعين الدرك
وسلام لك يا مطلع أمنظم وعالي نظمك
يردك مليون الف مره للحكم لي حكمك
خميس بن يسلم وأعيان البلد خب وأحترك
والمؤتمر شارك وكل مندوب ساهم واشترك
ولعادنا داري انا الصكه والا هم صلك
يمقدم العدَّه مع الغشمان وسَّع خاطرك
وسلام عا عده تدك الأرض والأجبال دك
وعلى العدد لي شاركو في العصر ملَّين الصرك
وسلام عاجمهور غالي لا مسكته ممتسك
غن يا حسين الصوت يا قهمان كلن يوصفك
صوتك تقول الا موسيقه بلفقيه أيشوقك
لاغبت مني شهر واحد جاتنا حمه وزك
انستنا وارحبت يا منصور حطو تاجرك
وانك تبا نصيحتي لاغابت دخل في عشتك
قم يا طويل العمر شاركنا وانا باشاركك