كلامك ياعمر بلسم لضيق الحال والخاطر=فتح نفسي لقول الشعر يوم اتقفلت لبواب
عرفتك نجم ساطع يهدي الربان لي حائر=ملك وسط العضيده وانت عالمنبر كما السياب
خلل باين في القاسم وكبش الساريه دامر=وقد شفنا الرضّه تنخر في المسلف وفي لعتاب
ولكن مصنعة حبان شف بنيانها فاخر=مهندسها يخُلّ العود ل أرضى بأفخر الاخشاب
ولاهي مثل عرشه فالمطر ما تمنع القاطر=ولو بيتت فيها غصب تصبر عا الوخم والداب

انا مانا بحد مقطور يعبر بي طرق صافر=عرف كل الطرق واعرف كباري واجده وعقاب
ونعرف حجر بن كده ونعرف حصن باجابر=فوارق بينهن في كل شي ياطيب الانساب
ولكن بالبنا والجهد والمقدام بو عامر=عراش البدو با تصبح مصانع نا طحات سحاب
طرحنا القاعده صبه لها والسور والدائر=وزفلتنا الطرق من بعد ماكانت حصى وتراب

خلل باين في القاسم وكبش الساريه دامر=وقد شفنا الرضّه تنخر في المسلف وفي لعتاب
ولكن مصنعة حبان شف بنيانها فاخر=مهندسها يخُلّ العود ل أرضى بأفخر الاخشاب
ولاهي مثل عرشه فالمطر ما تمنع القاطر=ولو بيتت فيها غصب تصبر عا الوخم والداب

حزوم امطاء معك يالذيب لاتغالط ولاتكابر=ولايمكن تسد انته وياهم عينة الاحزاب
ومن قلبه نقي من حيث هو ماغبه الماطر=ومن قلبه حسودي مايلاقي شي ولا واعجاب
انا بغيتك تريّض ماتقع ملقوف ومغامر=وانا عارفك تفهمني وضني فيك ماقد خاب
بغيت الصدق والواقع سمع من هرج بو ناصر=اذا تبغى تجيب الجوهره من فوق راس الداب

شفت الهرج ياعواله على الرجال متواتر = ودايم فصلكم حوله وشفت الباب بعد الباب
ماهو جم تلقونه في الماضي وفي الحاضر = دامه شل مخزوني وخلا الرف والدولاب
ماشي فايدها مادام ترضع نفسها الفاطر = والحاشي مسى يرغي ويرغي جمبه الحلاب
خلوها كما اول وسوقو لي جمل عاصر = جمل باداس ذي يهدر ولاشي في الجمل ينعاب