وانا علي باقول يالفنان غن= خل العرب تسمر على الصوت الحسين
وقت السلاء بنسى عيالي والوطن=باسير دخقه لاديار المبعدين

البعض في العيدان غالي في الثمن=وبعضها سعره رخص ماهو ثمين
لانفع لك منه ولا منظر حسن=ماله محل عند البيع والمشترين
واحنا نطرب فوق واحد في الكفن=ميت وكم له في عداد الميتين
حد من صلاب الروس بينوش الركن=او بانتمي هكذا طول السنين

شفناه لي قلتو يدّور عا السمّن=حتى عضام الناس خلاها طحين
واليوم جا وقته وقرب له كفن=هذا جزا كل الطغاه الضالمين

علمك قلبت اليوم لي ظهر المجن=يالواقعي ياصادق الوعد الامين
انك مع اهل الحصن ضد اهل الحضن=قلي وبعطيك الصراحه واليقين

عاده معي في الحصن لي باقي مكن=مادام ساسي عالحيود النايفين
باعطي وباخذ قبل ماشوف الدفن=يرموا جثث حق ناس ماهم ميتين

الجيش لحمر ذي حوى عاكل فن=بايحتوي عالقطن كله والعنين
صوله وجوله لي تقشعر بالبدن=بعد الزروره كلها بقعه تلين

الليل ياهاجسي مالليه ذهن=وفي السمر خلك مع اصحاب اليمين
واحذر من اصحاب الغوايه والفتن= ذي يتبعون الشر وابليس اللعين