هذي السنه في حجر بن دغار=يشكي حسن من لي حصله
نفضه في اليمنه وفي ليسار=نفضه ومخرز في المسله

انستنا ياللي عليك البار=شغلتك ياذيبان شغله
مسمعتك عنّك ياعمر اخبار=والدار ميخلونه اهله

يابن حمد في الهند ومنيبار=اربعماية خصله وخصله
والسحر بايرجع على السحار=جبنا لهم قاري وتفله

خلوه يستاهل لانه ضار=خاين غبي ياشين دله
عيمان دخلته لوسط الدار=واليوم يندرني برجله

مخْيَر كلامه شاعر الشعار=ذوقه عسل ما طعمت مثله
ما حد يوصّيهم عيال الدار= كلا معه قسمه وشله

الفايده راحت مع السمسار=ماشلها مخلوق قبله
واليوم جا ملقي علم وشعار=صورته في صدر المجله

هو ذي دخل بالهيج للجزار=غلطه من السيد وزله
واليوم طلع سيفه البتار=يبغا يرد الحق لهله

انته وفي منته من القصّار=لكن شل هذا وخله
لا لا تخش بالباخره ف قشار=وتضيّع المردود كله

حقي ونا حر فيه مابحتار=والبحر كل ماهر يدله
ويضيع مردودي وسط لبحار=من شان عمك مايشله