يازين ليت أظفر بعطفك دقايق =ادخل فوادك وأشغله في إستماعي
أثبت وجودي وأدعمه بالحقايق =اكيد غيض اللي تمنى وداعي
واوعدك خلي خاطرك دوم رايق= مرتاح واصفاء من حليب المراعي
واعطيك عهدا ماانكتب في وثايق =فحواه أي شي من جنابك مطاعي
حتى تبيني في معيّتك سايق =ما همني مادام طيفك شراعي
(ما دمت أعزك) ماتهم العوائق=لو كانت اخطر من سموم الأفاعي
ولاصار نبراس الأحاسيس فايق=ما عاد يصبح للسواليف داعي
الفعل ابلغ من حكي غير لايق=والجد افضل من حنين المساعي
يازين هوّن لاتشب الحرايق=الزين طبعه عاطفي وإجتماعي
لكن حذاري غدر بعض الخلايق=تأثيرهم وشعورهم إصطـناعي