ألا يا تبر يا أصفر ويا زمرّد ويا جوهر=معادن ما لكِن إقلوب وأثمن شي لدى الإنسان
يقول المخشني يا ناس نار الجوف تتسعّر=إذا جيبي إختلى منْهن ومنْه الدر والمرجان
أبا شاعر يجاريني يجيب لي قوله إمعطّر=أنا ويّاه با نسمر إلمّا يغرب الميزان
بغى الخنساء معي تدخل وتوخذ ركن في المسمر=ولو بالنثر با تشجّع وبا تدعم نجوم الدان
لاوي باه له لذعه قليل سكّر=يظل سموارها يغلي يشابه مركب الدّخان
يفوّح مشعبي يا زين لونه كالورود أحمر=وعَد ريحه وطعمه ينعش المطوي في الأكفان
وبا عيون المكلاّ وينها شهرين ما تظهر=عسى المانع دواعي خير ما شي شر أو أحزان
وولْد الذيب تشفيني قواله ريحها عنبر=يمين الله لا ما رد ... قل له با مِسِي زعلان
وبن أحمد في الموّال شوفه منّنا تعذّر=وكان العشق ألاّ للمشايخ بلّغوا وزران
وأيضا ذي يزن في قصره العامر خطاه الشر=وصقر الجو ذي حايم ولا يخشى من الأمزان
وبو جمعان ذي عامد شبام ولونها أصفر=قواله كالبغيّه لا حوت قرفه وحب الهان
دركني الآن يا محفوظ مثل الأطلسي تزغر=وجيب القول فاصل في المحبّه وإنت أبو جمعان
وعذروني أنا مذكرت كل شاعر على المنبر=ألا وش يحصي الشعّار كل وادي بهم مليان
ثلاثة عشْر من لبيات صغناها بلا دفتر=ورابع عشْر هذا كي نزيل الشوم يا لخوان

على هونك! ويالشاعر تراك اليوم متكدر؟=سلامة قلبك الطاهر من التنغيص والاحزان
أنينك رج للوادي وللوديان والبندر=وهز من الوتر جيثار بالحانك على الحلان
حمامه سمعت المغنى وردت لك بما يخطر=هديل اشواق يبكيها ترددها على الالحان
تسلى شوف في الدنيا من الالوان كم منظر=تهدي القلب والخاطر وتصبح بالهناء فرحان
وخليها على ربك وفي طاعته قم شمر=وربك بايفرجها بجاهه لك عظيم الشان
ذكرت التبر والجوهر..كذا الخنساء بوسْط الشعر=وهذي عيوننا غابت تناديها صوات الدان
وذيب الشعر قد بادر لآلي درها ينثر= ويلبس حلة المجلس وفوق الراس له تيجان
وابو هاني وسبع الليل وهذا القرشي الأسمر=تحدوا للقوافي والبحور الزاخره بطوفان
ومن يبغى يكدر صفونا مايوم نتكدر= من الاشرار لو حضروا يثيروا الجو بالدخان
ولكن اشعل الجمره واحط بخور في المجمر=وعطر جونا الادبي معاني الحب والاشجان
عسى ربي يجمعنا بدار الآخره عا البر=في الجنات نقطف من ثمار التين والرمان
وآخر كلمتي اقبل من ابياتي ولاتسخر=لاني منكم اتعلم اصول الشعر يالفنان

هلا بالدر والياقوت والمرجان والمرمر = هلا باللي حضوره يطرب الهاجوس والأذهان
اصيله والأصيله عزمها ما يوم يتقهقر = ولا تثنيه همسات الحسود وزوبعة فنجان
طريقك بإذن من انشاء السحابه سمح ومبخر= ولا يحتاج في سبك الطروق إفلان او فلتان