فلا تتبع اللذات في ساعة الصفاء= ولا تغُرّك الدنا بلحظة جمالها
تراها لها فتنه عظيمه وتنتهي=متى ما تعكى الادمي في حبالها
ولا تدوم عزّتها ولا يدوم ذُلها=ولا غبنها دائم ولا ستر حالها
ولا قوّه .. الا يضعف الوقت حيلها=ولا نعمه .. الا يوم ياتي زوالها
ولا لذَة الدنيا سوى الا عراكها=ولا للطرائد لذه الا قتالها
ولا من تمنى شي يجي له بلا عنا=ولا كل من شاف الثُريا ينالها
ولا اتخلّدوا لنذال من كُثر مالهم=ولا تنتسي الابطال وان قلّ مالها
ونفسك أذا هي للرديّه تسير بك=قمعها وقُل يا نفس مالي ومالها
وعاشر بحُسن الخُلق صاحبك والعدو=تنال الصفات اللي صعيباً منالها
ولا تقفل البيبان عالخصم تَحنبه=متى ما حنب كل المصائب لجاء لها
ولا ترتجي المعروف من غير لأبته=ترى الطيّبه عند اهلها وأهلها لها
ولاتقول ذا مالي وجاهي يعزّني=وتجعل لنفسك مُرتقى من خيالها
ترى الكبر يحبط كُلّ طيّب من العمل=ويسلب من النفس الكريمه خصالها
ومن قال جمّعت التجاره بحكمتي=ندم مثل ما قارون للناس قالها
فقد كان عبره للذي كان يعتبر=وقوماً معه ما هدّها الا ضلالها
ومن خاب فعله خاب ظنّه في العرب=ويحسب جميع الناس خابت فعالها
فخذ من شبابك مايعينك على الكبر=وللضُعف من قوّتك قبل انحلالها
فما قوّه الا يأتي الضعف بعدها=ونقصان لشياء يبتدي من كمالها
وكن مثل حالي مايغيّرني الزمن=ولا سير في وديان معرف جبالها
ولا قدّر الا من يقدّر مكانتي=ورقبتي محنيها لمن لا انحنى لها
ولا اتألّمت نفسي لمن لا يودّها=ولا قد بكت عيني لمن لا بكا لها
وكلمة نعم لو قلتها ما تبعتها=بلأ لو ذهب حالي ومالي فدا لها
اذا تفاخروا لقوام بالعرق والنسب=سلالتي من قوم عظيمه فعالها
أنا من بني قحطان لطّامة العدو=قبايل تورّث مجدها في عيالها
وصلي على احمد ما تغنّت مطوّقه=على غصن ميّال تغني لحالها