مبين اكثر واقل ياهي ثلاثه او ثنين اشهور=انا تغيبت عن بيتي وفارقته ونا مجبور
وجيته من بعد غيبه وحمد الله حصلته=كما معهده بالحلان والزوار زايد نور
هنيا ياعقيل الشهم ونهني لنوابك=وكل مشرف من اول صف حتى اخر الطابور
وللحلان انا بازف سلامي مع تحياتي=وتقديري وذي هو مجتهد باقول له مشكور
وخاص اخواني الشعار من واجبي حييهم=خوه واصحاب نلقاهم اذا جد ف الامور امور
ولا باخص حد من دون حد كل العباد اخوان=وشعار السقيفه كل ابوهم وافيين اشبور
على الحلوه وعا المره تعايشنا خوه واصحاب=ولا قد جات ابد زلّه ولاحد جاب شي تقصور
لان البيت متأسس على مبدا وعا منهج=وابو صالح لوايح سنّها والقا لنا دستور
وسرنا حسب منهاجه وتوجيهه على خطه=وكم واحد بفضل الله ثم فضله صبح مشهور
وهو من قبل مايعرف وش الكلمه ومعناها=قبل يسمع نصايح شاعر الوادي وهو مغمور
وصايا الذيب عا كل مبتدي ف الشعر يحفظها=اذا عنده طموح انّه في الساحه يقع هامور
ونا رغم الغياب الكل في قلبي ووجداني=تذكركم وكل ساعه تمروا ف الخيال امرور
ولكن ظرفي القاهر تحداني وبهذلني=وخلف جرح نازف في وسط قلبي كما الناصور
ونا شاعر وحظي قيم زي باقي عباد الله=ولكن بعد فرقا الدار صرت امشي بدون اشعور
تكدر خاطري والهم خاواني وزاملني=وكل من شاف حالي قال لي دور على دكتور
وما يدري بان (عذب القوافي)سقمي وطبي=اذا مريتها اتعالجت ون خليتها مغثور
يبيت العز رجعنالك بهمه اكثر امن اول=وحمد الله لا قيناك منته خاوي ومهجور
نعيد العهد لول ذاك لي مر في سقيفتنا=ونتوفق بعون الله وننجح والعدومدحور