مات الأدب مات وتوارى بموت الحبيب =الشاعر اللي له العربان ممنونة
إحدى عشر عام قد غابت وهو مايغيب =لي يسمعوا به بطيب الذكر يطرونه
اعنيه واقصده بومحضار ذاك الأديب=لي مانسيته ولا الشعار ينسونه
الشعر ينعاك كل ليله وحاله كئيب = يامن تجيب الدرر وأصداف مدفونة
والدان يبكيك والمغنى قتله النحيب =والناس من وقتها لليوم محزونة
شاعر مخضرم ومتواضع وعاشق لبيب =شعره مميز وغيره ما يجيدونه
يلي بشعرك تغنـاء كـم وكـم عندليـب=فيه العذوبة وفيه أسرار مكنونة
كنت الدواء فيه للعاشق وكنت الطبيب=كنت العنب فيه لي ما تذبل اغصونـه
يامنبع الذوق طعم المر جنبك يطيب = أحكمت معنى الأدب وأحكمت قانونه
ياراعي القلب والحال المدي والرحيب = المجد جبته وجبت الوعل بقرونه
فالشعر قد حزت ياسيّد على اكبر نصيب = بيدك إلى الآن مفتاحه وكالونه
يامن لسانك تنقط فالمدارة صبيب =واسمك وسيرتك باأجمل طيب مدهونة
يا هامة العشق عشاقك بعيد وقريب = الورد الأحمر على قبرك يحطونه
مرحوم يامن لنا صغت الكلام العجيب = بأذن الذي ساهره ماتغمض اعيونه
عسى بظله يظلك فالنهار العصيب = سعف النبي والصحابة لي يوالونه
رحمتك ياالله بها عم الحبيب النجيب =وادخله في قصر غيره ما يطولونه
والختم صلوا على طه الرسول الحبيب = واله وصحبه عدد ماحطت امزونه