مامعانا قضاء عادل ولا شيخ حازم = فالته للسرق واهل الفعول الخطيره
من نزل للبلد عوّد وهو صدق نادم = ما لقى شيء امامه غير امه فقيره

ياسلامي لكم ياكل عاقل وفاهم=يارجال الزمل ياهل البحور الغزيره
كل واحدمعه شاطي وغبه تلاطم=وادخلو كلكم في دايره مستديره

كل شي بامر ربك هو بالحوال عالم=وعابن أدم يصفي نيته والسريره
من مشى عالوفاء والعدل بيعيش سالم= والذي ينحرف في السير يلقى مصيره

كنت لاخوك لاجل النوم ساري وعازم=لامتى فوق هذا النت عيني سهيرة
حد معذب في الدنيا وحد دوب ناسم=ريتنا بينهم حيث المدارة مطيرة

قال بداع في ذا الوقت غاب التراحم = كل تاجر نسي ربه وضيع ظميره
دام قانوننا يمنع لغيره يزاحم = هاتواالحل يالشعار ياهل البصيره