كلام لك يالذيب ماله منفعه=كم لك تردد فيه قاعد دوب دوب
وين القوافي والربوط الممتعه=ضيعتها واليوم ضيعت الدروب
قاعد تلمع في الوجوه المفجعه=لي منّهم شعب اليمن ذاق الكروب
قد كنت من اهل القلام المبدعه=واليوم تب لو كان بايمدي تتوب
راجع حسابك يا عمر والقربعه=ماباتفيدك والمحازي والكذوب
كانت بيوتك شامخه ومرصعه=مثل الجواهر والبغيه لي طنوب
واليوم تنعق ياغراب المجمعه=والقصد والمقصود تعبية الجيوب
ماشي معك مبدأ ومرجع ترجعه=مرجعك شوعي من كثيرين الذنوب
وتقول باصبرين شاد المصنعه=وهو دمر كل السواقي والجروب
وحده قويه والخليق مجمعه=والساس ياتعبان من صبه وطوب
الخير واجد والرزاق موزعه=والدعم ينكب عاليمن من كل صوب
خلصوا النوايا والبواب مشرّعه=واحد يمن مابه شمال ولا جنوب
جاهل مصيبه كيف تقدر تقنعه=يبغى زمان الخمر واصحاب الحبوب
صوت التخلف كيف نقدر ننزعه=من ناس وسط احبالها سبعه قطوب
مسرور هو والجرو واهل المطبعه=اقلام مأجوره وكل بوها عيوب
واحد مزارع شغله الا المزرعه=والثاني الا ولد نجار العلوب
اما عيون ابليس مثل النعنعه=في كأس مويه يا عمر شفها تذوب
اثواب تلبسها كثير مرقعه=ثوب الخيانه يا عمر ياخس ثوب
عُقلوا وطفو نار حمراء مولعه=باتحرقوا فيها اذ1 هب الهبوب
سيلك مقارب ياعمر من تبرعه=ومزوننا وسيولنا شفها خصوب
اصل اليمن من المخا لا ميفعه=هي امنا يالذيب والضرع الحلوب
والي يقول العكس حنا نردعه=بانحرقه في كير مثناة اللهوب
وآخر كلامي كل منهو يسمعه=يذكر محمد سيدي طب القلوب

صح لسان الشاعر عمر الذيب ، الشاعر بالفعل يستطيع التعبير والتشبيه بطريقة جميلة ويؤثر في المتلقي ، و ردت فعل العم سالم الجرو حول هذه القصيدة ما هو إلا تعبير صادق عن ما تحمله هذه الكلمات منمن معاني وعمر الذيب شاعر متمكن وضف حروف قصيدته في تسليط الضوء على ما يجري حالياً في الساحة اليمنية وما ينتظرها في الأيام القادمة.

شكراً للشاعر عمر الذيب.