بدينا بإسم رب الكون متعلي وسبحانه=وأمره بين حرف الكاف هو والنون يا سبحان
وصلوا عا محمد مصطفى من نسل عدنانه=وبه عز العرب جمعاء بني قحطان والعدنان
سلامي يا نسيم الصبح لإبن الذيب وأخوانه=فطاحل في السقيفه خيرة الشعار والأخوان
وقل له وش بلانا يا عمر لحوال تعبانه = وكل واحد يعاني من بوتنافي الشقاء تعبان
نبصم دوب بالعشره على ما تباه قشرانه=ولا ننطق بكلمه لا حضر للدار بن قشران
وحتى ذي تبيع العِرض بعض أحيان زعلانه=ونا ما شوف في رؤساء العرب مغضب ولا زعلان
وشوف الغيث ضاويهم تحط عا الروس أمزانه=ولا شي با يقيهم سيلها لا حطت الأمزان
وسامحني على ذا القول جاء من نفس قلقانه=ولا شي طول يعجبني وكل الوقت أنا قلقان
غرق ما اليوم بو دقلين في الغبه بربانه=ومرثاتي لركابه بلا نوخذ ولا ربان
وبعد اليوم ما با تشوف زَمراته ودخانه=ميه يا هوين يا حسفه تضيع مركب الدخان
وغاب النجم ذي قد كان للتاريخ ميزانه=متى با تبزغي من فوقنا يا نجمة الميزان
تبدى القرم ذي يضرَس وهو للمجد عنوانه=وبعده صارت النخوه بلا معقل ولا عنوان
وراش اليوم يا الأمه أمورش دوب خسرانه=وغصتي لا نخاع العظم في الذله وفي الخسران
بطيتي يا أمة العربان منهوكه وحنبانه=ألا يا با الكرم نسم عى المنهوك والحنبان
لعب فينا كويفر رغْل متربي وسَط حانه=يوجه للعرب عمدًا مهانه غالب الأحيان
وغرّق كل بلد مسلم بزنوانه وفرسانه=فيين إبن الوليد إللي يسمى قايد الفرسان
وقال الكون حق له خاص والميدان ميدانه=وندّر كل غيره يا عمر من ساحة الميدان
بقي لك دب في مُسكو ومتقبض بآذانه=معا الأدمش ولَد شينه وصقعاء حقه الآذان
وذي يعبد جواميسه وكوري مات شيطانه=ولا شي منهم مردود قوم أبليس والشيطان
ومولى النارجيل إللي تعنكـَـر لك بخلقانه=وعبد إحسين ملقي فوق رأسه عصْب من خلقان
وهو الملعون عنده كل شي مخزون في خزانه=وموية شرب ما إلقاها تقطـّـع داخل الخزان
وأنا نفسي تزم لا شفت خلق الله من شانه=خبب كلن بغا قربه ومرضاته رفيع الشان
عمر يا الذيب هت ردك حكـُـم ساسه وبنيانه=وبت ليله معا الجني سُمُر في عالي البنيان
وجيب ألا الذهب لصفر ولولو خلْط مرجانه=وأنا من قاعها غبة قمر با جيب لك مرجان
وختم القول بِصْلاتي على من كان بأزمانه=سراج النور للأمه عدد ما إتعاقبت لزمان
وعد حب البرد كوّن وهل من وسْط قنفانه=وعد طش السبل يحيي الفلا لا ناحت القنفان

بن موكاوعمر يالذيب بنيتوالساس واركانه=وقام الحصن لي يعجب في المبنا وفي الاركان
صبح مضرب مثل محكوم بالاحجاربنيانه=مقاوم للمطر والسيل لي هو حاكم البنيان
يرحب بالذي مبعد ومقصد كل جيرانه= ولاضني بيقفل باب لاجا حد من الجيران
حموه ارجال من خيرة رجال الحرب رميانه=خذوكاس التمزيز ذالسنه في ساحة الرميان
وانا والله عجبني ظرب من بلجيك وعيلمانه=ونا ماحبه الرشاش وملقي عالكتف عيلمان
لكم مني تحايا جم عدد مااصطك امانه=وفي وقت الطلب لاياصحابي ينفتح اللامان
ذكرتولي في الحال الذي مايوم قد زانه=رجال الغرب لي قالوابشرو شو قتكم قد زان
تغير كل شي لي كان عا نهجه وعدانه=ولاشي نصر لما كل شي يرجع على العدان
غريب الحال حتى النخل مايرويه معيانه=يموت اليوم واعروقه وسط النبع والمعيان
والمالك صبح مرثاه يتعكين سيقانه=همومه جم والهمه قليله ترقل السيقان
ولاحد قد ظهر يدرك وكل الناس هيمانه=في القنوات لي تدعيك يالعاشق ويالهيمان
ورشح من تحب ياشاب فنانك وفنانه=ولاتبخل بماعندك فقط في نصرة الفنان
زمن كله مأسي والعرب بتشوف بركانه=وصعب اليوم تتحدا حمم يقذف بها البركان
وحتى من بعد منه بس يكفيه دخانه=عمى اعيونه صبح عاجزوبيعاني من الدخان