يالله عبدك تحت بابك ساجد=راكع وساجد مخلصٍ بالنيّه
يا فرد وحدك يالاله الواحد=فلا شريكٍ لكَ في الملكيّه
يامن تعالى فوق عرشه عامد=من فوقنا جالس على كرسيّه
وارفع سمواته ولرضه ماهد=والقى قواعدها حجر مبنيّه
والبحر لي فيه الموج تتطارد=متقاطره تجدح على شاطيّه
فيها السفن تسبح بما هو وارد=للنقل شي فيهن وشي حربيّه
ذا فضل منك يوم فضلك زايد= نحمدك بالجهري وبالسريّه
يالله بعفوك يالكريم الماجد=من كل زله مننا وخطيّه
ثم قال بوتركي وليله هاجد=في هود وحده في غرف مبنيّه
لا هم من دنيا ولا نا حاسد=والقرش ما همه ولا الربيّه
لا شي معي صادر ولا شي وارد=ولا معي في القلب شي حنيّه
هاجس ضوانا والحليله وافد=وقوموا مبروك من كرسيّه
هاجس ضوانا في لباس القايد=واما الحليله جاتنا مهديّه
حسنا جميله نورها يتواقد=وضروس معها بالذهب مطليّه
لبست حللها والحلا متواجد=ومسوح لبست بالحلل مكسيّه
جونا على غفله وقد نا راقد=ما طْروا على بالي ولا وهميّه
لما متى قالو علينا شارد=واحنا ندور لك بكل عصريّه
جينا وراك اليوم با نتفاقد=ومن زعل جيناه با نرضيّه
فقلت يا اهلا بمن جا قاصد=اهلا وسهلا بالثنا وتحيّه
خاطري صافي من طرفكم واجد=الكبر هو لي جاب كل اذيّه
با نتفق ذلحين با نتفاقد=ومن خلف في العهد له جنبيّه
اخباركم يا معقلين الشارد=هاتو خبركم واسرعوا به ليّه
جينا نخبركم بشعب واحد=من بعد ما كان اليمن جزأيّه
قادة عدن هم والعقيد القائد=علي زعيم القوم والحريّه
واتفقوا القاده بعزم صامد=وحده ودوله تنطلق يمنيّه
على الوفا والبر يبقى خالد=قدوه تقع في امة اسلاميّه
شمالها وجنوب صف متراصد=مثل الحجر في اسواسها مبنيّه
هذا الذي نطلبه من كل قايد=واحنا معه لي يطلب الحريّه
ولعاد يستشرف علينا كايد=ولعاد شرقيه ولا غربيّه
اهل اليمن اخوان ماحد زايد=الشافعي واخوانه الزيديّه
ولعاد ذا نهدي وذا من حاشد=اولاد عم واخوان في الجنسيّه
ودينهم لسلام والله شاهد=على كتاب الله والسنيّه
يا اهل اليمن يا مرسلين الوافد=لشعث وصحبه من زعامة زيّه
على محمد الرسول الراشد=لي هو بعث في الامه العربيّه
يا اهل اليمن تاريخكم متواجد=معروف عند الجن والانسيّه
واليوم جددتوه معكم زايد=مانساه هو معنا في الذكريّه
وبو خليفه سد مارب ماحد = رده مثل ماكان بالنقديّه
سجل له التاريخ عندي زايد=انا اشهد انه من عرب اصليّه
يا اهل اليمن ذا خيركم متواجد=كونوا على وحده وطيب نيّه
فيكم رجال العلم كم من زاهد=وشيوخ بالحكمه وبالعقليّه
كم با احسب اهل الزهد ماهو واحد=ايمان والحكمه ضوت يمنيّه
ذا وصف فيهم صدق وان حد جاحد=قله لهم غزوات للروميّه
اليوم يامرحب بجيل صاعد=با يبلغ المريخ والقطبيّه
ياريت انا الا في شبابي عايد=واحضر مع الابطال والنشميّه
ذا قول من راسي ولا نا جامد=وكتبت باليمنى وانا قاريّه
هذه قوافي جبتها ومحايد= مثل بها الحضران والبدويّه
واليوم بو تركي حذق وتقاعد=ولعاد شي له بالسياسه نيّه
ذا لي حصل مني ومن جا ناقد=مقسوم بالميزان في قافيّه
يارب سامحنا بعفوك ساعد= يارب بارك لي في الذريّه
صلاة مني مارعد به راعد= وعد مالبارق لمع منشيّه
على محمد نوره المتصاعد= شفيع لمه سيد البشريّه
وآله وصحبه وكل من جاهد=لي جاهدوا الكفار والحزبيّه