يا أهل المعاني ذي تديرون الفكر=عيني على مركب في الغبه طمر
قولو لبن قطمان شي عندك بصر=ولا شف المركب في الغبة غريق
خايف على لولي وخايف عالدرر=في بحر مظلم مالحقنا فيه بر
قالولي الربان يمشي عالخطر=وش يخرج المركب من البحر العميق

ويقول بن قطمان قد ضاع البصر=مادام كل واحد على قرصه جمر
مليون وألقو فوقهم سبعه عشر=للمؤمن الجنه وللكافر حريق
والله يعين الناس من شغل الغجر=حدادهم ظالم مبهذل بالنجر
والسوق ياويلاه من شغل التجر=وكوادر الشرطه على عرض الطريق

العود ماذلحين مابين النجر=حد منهم ينشر وحد مبعد نشر
واهل العمايم وهم ويااقصار العصر=ذلحين كل واحد يشجع له فريق
وصاحب القمبوس قمبس عالوتر=الطبل و المزمار عند اهل الوصر
كلن على كيفه يجر الصوت جر=والشرح مايعجبك لاماله صفيق

ببني حجر ياصاحبي فوق الحجر=وباتمسك في جليلين العجر
والمال ذي مدمون بايلقي ثمر=والصدق عنواني معك لنته صديق
والادمي ياخذ من الدنيا عبر=يحسب حسابه لاطلع ولا ندر
يصمد ولا يجتر قفا بعض الصور=ويبند الياقوت من صنف العقيق

هرجك كما طعم البغيه من صرر=جبر عظامي بعد ماكانت طير
يدي بيدك بنتقصص للاثر=والعيد بانلقيه بالكبش العريق
والوضع حتى الان عاده مستقر=والحبل مابين العرب مزرور زر
يالله تجبر عظم عاده ماجبر=يوم الشقيق اليوم ينشد عالشقيق

والهرج من عندك يسر الحال سر=واحد ولكنك كما عشره نفر
تكتب على كل المعاني والفكر=واليوم بانعطيك في الرتبه فريق
ياريتني لاقيك لاطاب السمر=واظفر بسمرتكم مع من قد ظفر
وصافحك من بعد ماجول النظر=هذا جوابي واطلب الرد الحقيق

انته وانا ياصاحبي شفنا بشر=ريت المسافه بيننا مد النظر
ريتك في الدمام ولا فالخبر=انا مقيد وانت فالدوله طليق
ان طالت الاعمار بيطيب السمر=في داخل الوادي وفي بندر عمر
وان جيت لاسيؤن حيا الف كر=عالعز والناموس يا اغلى صديق

اصبر وصابر كم وكم مثلك صبر=ربي جبرنا عالتحمل في السفر
والله يفرجها لنا بعد العسر=والله يداولها من الزام السحيق
خرمان للسمرات شف راسي طير=وارضي لها الذكرى حجرها والشجر
واشعابها واخبوتها بحرا وبر=خرمان ماهي للشواهي في بريق

انا معذب و المعذب في كدر=ريت الكفاله بايشلوها التجر
ياحيدره مسكين من حبله قصر=في ذا الزمن مابايحصل له رفيق
وانته في الدوله وراكب لك شفر=ملقي لها جولات في بحرا وبر
ساعه قدا روما وساعه للمجر=ماتنتظر تكسي على خط الطريق

اليوم قربنا على سن الكبر=ولانسينا ايامنا وقت الصغر
والذري مايطلع في المال العفر=والبعد والحرمان حاجه لاتطيق
ومركب العشاق عاده ماشمر=بوزيدبايشهد مع يحيى عمر
وانته قدك معهم تجر الصوت جر=والوقت يتوسع وساعه فيه ضيق

المشاركة الأصلية كتبت بواسطة أحمد العمودي أبوفيصل (المشاركة 361650) الاخ بن قطمان محاوره شعريه رائعه جدا وليس بغريب على شعار امثالكم تقبلوا تحياتي ودمتوا بود