ببدي ببسم الله حسب العـاده = وبالمشفع وآل بيته القـــاده
وهاجسي بايجي على ميعــاده = والحبر عندي والقـلم والكراس
مرت على ذكرى وفاة المحضـار = سنين أربع من خــتام المشوار
رحل وذكره لم يزل والآثــار = بقيت مع الأيام يذكرها النـاس
مَنْ مثل بو محضار في ذه الساحه؟ = يوزّع الأشعار في أقداحـــه
خلاّ البلابل بالغنــاء صدّاحه = بالحان حلوه منها نــاد الراس
فريد في شعره وفي ألحـــانه = دنت بأجمل فاكهه أغصـــانه
طبعه المحبه والوفاء عنـــوانه = وفي كلامه درّ غالي وألــماس
أدى الفرائض كلها والســنّه = وساعد أصحابه بدون أي منّـه
وناتعلمت الــمحبه مــنّه = ولحقت في يده دواء يشفي البأس
في إبتساماته صور وعـــباره = وفي دموعه كوكبه مخـــتاره
ومن حنــينه (إسمعي ياجاره) = وأشجان فيها ذوق راقي وإحساس
وعاد أشــــياء ثانيه مثبوته = بخط يـــده أوبنبرة صوتــه
وإحتفالات اليـــمن ماتفوته = حبه لأرضه ما يقاس بقيـــاس
حب الوطن مغروس في وجـدانه = يجري مجاري الدم في شريـــانه
وبالمحبه قد نصح إخــــوانه = وشيّد المبنى وحكّم الســـاس
في (الشحر) ميلاده وفيها قد مات = وفي (القويره) أهل لــه وبنايات
وله نســابه بالذي في (عينات) = وفي (المدينه) طيبين الأنفـــاس
لسعـــاد في قلبه وشعره موقع = في وصفها صــاغ الكلام الممتع
وإن غاب عنها جاء إليها مسرع = مشتاق للغصن الجميل الميـــاس
واليوم للأستاذ أصــبح واجب = مشاركه يعكف عليها الطــالب
ويقدم الصوره بأجمل قـــالب = ويصب للقارى عسل وسط الكأس
ونا من إتلاميذ هذا الشـــاعر = والإســم (حامد إبن عبد القادر)
وإن كان شي زايد صـدر أوقاصر = لابأس قولوا ياحبايب لابـــاس
والآن بانادي الزعيم القـــائد = بالعزم والحكـــمه يصحّي الراقد
والإبن لوما نفذ أمر الـــوالد = في القوت حطوا له عروق البسـباس
لي في الثقافه ما يحرك ســاكن = مسكين ســـيارته تبغى (باكن)
يعمل بمجهوده وعزمه لكــن = مبناه في أربع دقائق ينــــهاس
وأختم مقالي بالنبي الشـــافع = ماسبح الرحمن مســــلم راكع
وآله وصحـــبه كلهم والتابع = لي مامشى خلف اللعين الــخناس