طالب باتيس
شعارنا لا تشعلون النار=في جوف بوراضي كما المرشون
من قولكم دار الفلك بي دار=وأصبحت في الشارع كما المجنون
ياريت في يدي مية طيار=بغزي بهم لما مدينة بون
بلقي كما رمزي مع المحظار=لي زوعوا العالم وكل الكون
واهل الميازر والرصاص الحار=بالثار ماشي عذر يستوفون
هذه بشاره وابشروا بالثار=با تجي بشاره من قدا سيئون
جمــال العطاس
هم دمّروها دكّــوا الأســوار = والآن شوفوهم بغـــوا يبنون
ويطالبون بإعادة الإعمار = والتكلفة من نفطنا المخزون
والدور ذي قادم على كم دار= ياويلهم والله من شارون
ذي مالهم عند العرب مقدار = وشعوبهم في قِلها في الدون
يا ساتر استر رب ياستّار = لاعود صك في عود با يبكون
حسن بن حيدرة
شفت العرب كل من سقط ماثار=عابعضهم كل يوم يتشاكون
مابوش باينقح لهم بالطار=لما معه بالغصب يشترحون
وان كان شي نقذه من النجار=يلقي على السده لنا كالون
والا يدق عابابها مسمار=من شان نخزي الكافر الــملـ.......
طالب باتيس
بسمر بصوت الطبل والمزمار=لما يجينا هام بن هيدون
وانلقلل الخشبه على المنشار=ويحكمون القطع لي يشقون
ويختلط حالينا بالقار=وينطلق كل من مساء مرصون
وبعد لا يامدينة الانوار=هاتي خبر من ولد بن هيدون
شاعر وعده خيرة الشعار=قوله يجي مثل العسل مشنون
وقت الطلب مابايجيب اعذار=لا قد دعيته يطلق المسجون
خصه سلامي عد ماقد سار=ساير برجله في خطم عقرون
يالسيد احمد بلغه ماصار=قله وصولك عندنا مسهون
قله هلاء ياخليفة المحظار=لا عند بوراضي مية مليون