[سبع الليل]

لعبوا بنا حكامنا لعبوا بنا لعبت كره=ماشي عداله داخل الميدان يالي تلعبون
حتى الحكم في صفهم يلعب عصوبه مزرزره=الضرب كله فوقنا واللاينات ياشرون
ظلموا فريق الشعب والامه بضربه مدمره=وأيش عادنا باقول في الحكام ذي هم يرتشون
أن قلت شي قالوا سكت خل اللعب والمسخره=شف عاد ذي سلطات عليا فوقنا يتحكمون
كل مابدينا بانجبر في عظام مكسره=او بانغير في الفرق واللجانها تو يزعلون
بلدان عربيه كثيره ذا الزمن مستعمره=فيهم هزايم واجده واهداف جم مايستحون
داخل ملاعبهم تلاحقهم هزايم منكره=خطه قفاء خطه وحراس الشبك يتقاتلون
والكابتن كذاب ما يعرف أوصول المديره=وظهيرهم الايمن والايسر بل كره يتويغدون
حتى المدرب أجنبي ديح بهم في المنتره=كافر يهودي بغضه ألا للعرب والمسلمون
لما متى بايستمر لعب الكره والكركره=الدوغ كله والتعب فينا وهم مايتعبون
تجروا من السرقه ومن كثر الخور والسمسره=وجمهمرهم بين الصحاري في الخيم يتعذبون
الجوع فيهم والعطش والبهذله والحرحره=دركاه يادركاه وين الناس ذي هم يرحمون
ولي حبوا الدنيا وتبعوا غيها والفشخره=بايجي لهم يوم اسود عيف لي يتفرعنون
أنا المشيع لي حقوق ملزمه ومقرره=بارشح الكبتن وحكام الفرق لي يصلحون
وأن كانه الا حكم بالقوه بغوا والعنتره=مابانقاوم شي دول ونحن بشر مستضعفون
لا حول ولاقوه لنا ايضاً ولاشي مقدره=الجيش والشرطه تساندهم على مايشتهون
مامنهم شي فايده عقولهم متحجره=من حيت ماسرحوا ضوو بعيون حولاء ينظرون
شله تشل البيت الابيض والوجيه المسحره=عسا لبوهم زلزله فوق ارضهم يزلزلون
ضحكوا علينا ضيعوا عاداتنا والهوبره=ونحن نقلدهم ونلبس مثل ماهم يلبسون
قالوا تطور ياعرب بلداننا مطوره=وانتم كما مانتم ملقين العمايم والدقون
حلقوا لحاكم والشنب خلو النساء متحرره=لا نعنبوكم ياقلال الخير لي ما تستحون
أيش حاسبين نحن كماكم مجرمين او فجره=نحن نخاف الله وفي كل الامور محافظون
وديننا الاسلام لي خلاء القلوب متُنوره=ورسولنا طه ختام الانبياء والمرسلون