معدشي نوم قال الذيب فر النوم من عيني=ونا ماشوف لكن حس به كل امر ما يشتاف
احس بالذل هو والويل لي صاب الفلسطيني=وخلق الله تتفرج وزاد الظلم والاجحاف
وظلم الاقربون الاهل يضحكني ويبكيني=لانه ظلم زايد ظلم واستهتار واستخفاف
يترجم حلم والا علم منه لا تصحيني=دعيني يالحليله في منامي مثل من لا شاف
عرب تذبح عرب تقتل ونحنا نشجب الصيني=ولي يلقيه بن باراك شجبه صمت واستلطاف
بناتي السبع لاشلن ولا حطن مع تشيني=لحد الان في ورطه ودائم في نكد وخلاف
وسبع الليل يتامر على السودان والكيني=وعا بشار ملقيله حنق والقى اليهود احلاف
ونا المسكين بن عمي يحز عظمي بسكيني=ولا حد قال ذا منكر فيين العدل والانصاف
فيين الجامعه وفيين مجلس الامن يحميني=واوباما فيينه لي يقولو كامل الاوصاف
فيين المجلس اللي كان مابينه وما بيني=تامر ضد عباد الله في الريده وفي لنجاف
تركني وانتبه للاند نوسي والفلبيني=وحارب قم واصحاب العمائم حرب استنزاف
معدلي غير برهان الحبايب بايبديني=عيال البار والحامد مع المحضار والسقاف
وسيف الحق ورجال القبائل لي على ديني=لهم سطوه ويد في كل شده يمنو المختاف
معدلي غيرهم هذي السنه الا سلاطيني=متى ماتوحدو با يطلعون الدلو والخطاف
كما قال المثل ماغير شعبي شعب يسقيني=سقيني ياشعابي من قبالي الارض لا بلحاف
سقيني وادركيني قبل ماتذبل شراييني=وغيثي قلب عا شعره يشابه ما مة الكشاف