[محمد سعيد بن مخاشن]

جواب على عجل

مرحيب بالقول جاني مصطلب مبرم=قول المقدّم لذي ينشد على عياله
مشغوب منّي لأن قلبي عشق ربرب=خرعوب مزيون مترف من بلد سيوون
السر لا زال في قلب المحب مكنون=
.=.
غازِلْه كل يوم من شوّال لِمْحرّم=ما قاصر ألاّ نجي له وسْط مطواله
ناموس عندي غلب ما طاع وإتحطنب=ما جي في القاصره والخايسه والدون
السر لا زال في قلب المحب مكنون=
.=.
يا بَلْحَمَر لا تظن أسقاني العلقم=ذلا بشر خاين ومخروق مكياله
قفاه نسعى بغيت أعطيه ما يطلب=ظنّيت بنِّه منسّب من بني هادون
السر لا زال في قلب المحب مكنون=
.=.
وإنثرَه ذلاّ من القعرور أو مقرم=فتّشت وإنشدت عن عمّه وعن خاله
وإن عادني جيت له يصعقني الكهرب=لدريت به في المكلاّ سِرْت لا سمعون
السر لا زال في قلب المحب مكنون=
.=.
مانا بمجبور عا دنغوره إتأقلم=با انسى طواريه وإمسح رقم جوّاله
في عشق صمرور ما بن عمرو ما ينشب=ما نعشق ألاّ بني سعدون أو عزّون
السر لا زال في قلب المحب مكنون=
.=.
ما همّني ليث ... وش لو كلب يتهرّم=أو ثعل ينبح وتنبح معْه لِثْعاله
والله ما أقلق ولا يا خوك با أتحسّب=وإترك وخل هل بضه يلقون ما يلقون
السر لا زال في قلب المحب مكنون=