[رنين الوتر]

إهداء إلى الواقعي

حـــــــــــــــــــــــزوم القــــــــــوم



يا الواقعي هات نبغا علومك=من بعد ما غصت في وسْط غبّه غزيره
كل يوم عا الناس تشكي وتبكي=وتقول عمري عبر في الهوى مظلوم
.................................................. ..=
من بعد ما اصّلت حليك لسومك=في الجدفره ما يخالف يقد عا النصيره
واليوم كنّك على الحلي تتكي=با تٍكْسٍرٍه قبل ما تصّله للسوم
.................................................. ..=
يا العلب من بعد ما حت دومك=وصلبت ويبست من بعد ذيك الخضيره
قد كان مسقاك من خير منكي=يبست عروقك ومن ماءالكرع محروم
.................................................. ..=
يا المبتلي بالهوى في همومك=عايش معذب وحالتك حاله خطبره
ولغير بلجود لا عاد تشكي=خل الشكيه على الواحد القيوم
.................................................. ..=
وان صحت وان لحت ما حد يلومك=عا جرحك اصبر وعا الحاليه والمريره
ما دمت مطعون من نصل تركي=قصبي قديمي سلب حدها مسموم
.................................................. ..=
كنك معا الوقت نقصت عزومك=قد كنت تشبي ترص في الحسور الشتيره
لا انته حمومي ولا قول حلكي=والا سياسي حراكي كما باعوم
.................................................. ..=
يا مقدم الربع يا رمز قومك=انته حزام الفشق والسلب والذخيره
ارجوك تجلاه ريبي وشكي=شي فرق جم بينهن بعلبك وبروم
.................................................. ..=
وش صار ما بين امسك ويومك=حبك وقف ما انطحن في الرحى المستديره
وراك خفيت ولعاد تحكي=باللي حصل والذي صار يا الصمصوم
.................................................. ..=
قفيت تركت حتى صرومك=والقفت لبنان خليت شبه الجزيره
عا وجهك اقناع والإسم حركي=والسر لي كان مخفي صبح معلوم
.................................................. ..=
اعداك فرحوا وفرحوا خصومك=وانت السبب جبت للناس ضوله ونيره
واحرشت ما بين مدني ومكي=خليتهم كل واحد كما المغروم
.................................................. ..=
مشكور يا القرم كامل لزومك=تشهد لك الناس بالفضل في كل ديره
في ساعة الضيق بتقول دركي=دايم تصدى لها يا حزوم القوم