[حسن محمد سالم باقديم]

اقتباس : المشاركة الأصلية كتبت بواسطة الخليفي الهلالي [ مشاهدة المشاركة ]

جيناك يا باقديم وماحصلناك في السقيفة وين غبت ياابوالجويد..؟؛؛؛؛؛

حياك الله ياالواقعي
شف يابوجمال ياخوي جيتنا بغيت باتربع من الريم ... اتو البيوت من ابوابها بانردك الى فقر الباب ورقده فوق رقده لحتى نشف بك الريم ولا شفينا بك الريم اذا بغيت المرباع ربع ونطش بكل مافي نفسك كلمتين في تعقيبك لها واديين وانت بين دربين الدرب الاول صراط مستقيم وصراحه وصدق وعشره وايمان ومخاواه الخ والدرب الاخر ...................................... وكل شي في وقته بيجي وتقبل مني زي ماقلت هفاش غدر

نشدتني عن الغيبه
الغيبه الاولى وصل الواقعي قبل فتره للوطن ومعي الخبر منه وعده في جده وانا اكرر عليه رسائل هاتفيه ومكالمات ازيد من 30 رساله لك واجب عندي ياواقعي وهو يوعد وقلت له ذمه في رقبتك لك واجب عن باقديم وتكراري من معزه له وتقدير حبينا الولد حب في الله محبه مايدرى بها هو يدرى بها الحق العليم ووصل القطن ونزلت عنده وداره وفد يجي ووفد يروح ماتختلي والولد بشوش وكرم حاتمي لم اشهده في حياتي يرحب ويسهل وبحر زغار يعطي كلين جبره ورضاه وابتسامه وكرم حاتمي ازاده الله من فضله كلمة حق اقولها تفرح لمثل هاولاء لا ربك عطاهم الله يزيده مهما قلت في حقه لن اوفيه بايحصله قدامه ماشي يضيع عند ربك وكنت تغديت انا وياه ع صحن واحد وقمت وهو يقول تغذ ياباقديم وقلت له كرمك الله وطلعت القصيده وانا عاصحن الاكل وقلت


كرمك الله في الدنيا ويوم البعث والمحشر = ولا هي خردله ماتضيع يااهل الدار
ودار العز مفتوحه لمن صعد ومن حدر = تعز الضيف وتعز المحب والجار

هو يعرف ذالك كرم حاتمي عن ال شريشر لم نشاهد مثله من سخى نفس بايحصلونه قدامهم ذي عند الله مايضيع

جلست ايام من شانه واسترخصت منه وقلت له بسرح وكلمته في واجبي وكررت وقال لي انا طالع المكلا والخبر مني رددت عليه وتحركت المكلا ويشهد الله من يوم وصلت المكلا وانا لاخذت لي لقمه خرجت من البيت رتب وعرب وقرب بغينا مظهر يجمل ويليق بمقام الواقعي يشهدون علي اخوانه نهد بيني وبينهم ثلاثين متر الدار بجنب الدار وصحت في المقدم حمد باقديم وفي المقدم حمد باحسين السومحي وقلنا لهم لنا ضيف عزيز نريد ستين من روس الرجال الزماله قالوا طلب رهن الاشاره ورتبنا المحل في منطقة رشنيت جوار المكلا ولاكن الاصحاب قالوا الجو حار ثم ذكرنا مزرعة فيصل بازعيبان ورحت لفيصل وقال ابشر ياباقديم المزرعه تحت يدك والفله واثاثها واي خدمه فله مكيفه وسيارة احد اخوانه في الترتيب معي ليل ونهار نهشل ومتعوب باقديم

ثم قمت بترتيب اخر سريت لباسومح الشيبه والشهود وجود وزهمت عايون على رمضان بامسلم وزهمت عيسى برجف وعنيته يلقط اهل الفن الحقيقي اهل الاحساس والمشاعر والذوق رغم انهم حد يبعد اربع ساعات من المكلا وحد ثلاث ساعات كل من كلمته قال حاضر ياباقديم قلنا لهم لنا سنين وباقديم في واجبكم حل السلف قالوا حاضرين متى نجي وكل ليله في ترتيب قالوا صحابي شف صاحبك الواقعي متى بيجي من اجل ذيهوا بعيد يجي على وقت معلوم وانا زهم من المكلا وارسل رسايل متى طالع يابوالوليد حدد لي وعد ويوم وهو يقولي الخبر مني عدني مزحوم باالناس قلت لصحابي معاد بانزعج الواقعي خلوه على راحته قال الخبر مني وبخصوص المبعدين صحابي جاويد قالوا ان هجم صاحبك المكلا في فندق سره وقطب وعد والمبعد بنجيبه يابوالجويد لاتهمر ترتيبات واجده وهمره نريد التشريف له من زامل ومدخل حشيم وجلسه غناء ليسمع الواقعي الفن والصفو واهله ذي يغنون من خواطرهم ماهم حق فلوس المغني يدندن وعينه ترف من شجن وعواطف واحساس والمدرفين يعطعطون ويثقبون بااللحون من شجن وعواطف واحاسيس جمعنا له اهل الفن من محبه ومقدار وباقديم تعبان ... على ماقلت به في هذه رسالتي بشهوده بغا عشره او عشرين حلاف ومنهم من نهد ... قلنا نريد حشمه عضيمه له ورحت لبامسعود المصور وقال بحضر كلهم عشان باقديم لاانني لاهرو مني جيتهم ولاكن فوجئت بمايلي

تلقيت خبر من شخص في المكلا قالي وينك وين ياباقديم الواقعي قده بجده قلنا مايمكن ذه اربعين رساله ووعود ومكالمات وعاده بجده ووعد وهو في القطن قال هذه ذي سمعته انه مشى جده تاكد ياباقديم وخذت التلفون وزهمت على احد جماعته من ال شريشر قلت له عادكم في زحمة الناس وكيف الشيخ عبدالعزيز قالي ابوالوليد قد مشى الى المكلا ومن المكلا مشى من مطار الريان الى جده تاكدت عادني منه وحسيت ان حد طعني بجنبيه

تحرك ووصل المكلا وياريته افادني حتى برساله وعذر الظاهر ماحد داري بسعاده في سوق البصل
انها سياسات فباقديم قد له ايام في القطن مزقول كما جعفر بامحمد يسرح بسياسته الظاهر مفاهيم السياسه طلعت خطا عند بو الوليد ميه في الميه وسياسة البدوي صابت على كل حال من عمل شي عمله في نفسه
ذا تعقيب ولي تعقيبات باتحط احمالها كل ماوعدت به قادم انتظروا تعقيبات اربعه وبعده الوداع ......... انتظرونا