[سالم علي الجرو]

الشاعر سالمين علي بازهير في وفاة ابنته -رحمها الله-

يا مَن بك اتوسّل إلهي وإدعي = منك العوض والمغفره راجيها
سالك تصبرني على ماحل بي = واحزان قلبي كلّها تجليها
ويقول خو لثنين ساهر طرفي = واعضاي من جور الأسى ما اوحيها
ليلة (لحد) فارقت مهجة قلبي = في سبعتعشر من رجب نبكيها
عام الف والأربع مية بالهجري = والسبع وثلاثين تم باقيها
حسره على بركة عيالي واهلي = ياما هوت لَعيُن على طاريها
إبنتي وأختي واعتبرها أمّي = مَقدر على جوداتها جازيها
لا جيت مستعجل وسمعت صوتي = وصلت تخب من قبل ما ناديها
وامي تناديها صديقة عمري = حسرتش يا يمّه على ماضيها
البِر فيها والحنان الأخوي = والعطف والرحمه غريسه فيها
والصبر ميزه والإشاره تكفي = والمطلبيه ما تحب تثنيها
جملة شئؤن البيت عنها تدري = واي مسأله تختص بنا تعنيها
وان شق عليها حال تصبح تبكي = والإبتسامه وحدها ترضيها
قبل أمس مازحها وتضحك جنبي = واليوم من تحت الثرى واريها
فجاءه خطفها الموت غصباً عني = ولعاد اقدر بذل جهدي فيها
يالموت لو خيّرتني في نفسي = هيّن علي مقابل ان تبقيها
باتحزن الجمعه أشد من حزني = والكهف باتحزن على قاريها
من جور غليان الأسى في صدري = باكتب ولكن ما قدرت ارثيها
تتقبّل البيتين هذي مني = وهي شوي في حقها نلقيها
جمع المراثي في القصيد العربي = مرثاه في ابنتي ما تكفيها
قاست وعانت من مرض مستعصي = قال (الغزالي) مَستطع داويها
نقص الصفائح في النخاع الشوكي = يفقد لمل للعيش في راعيها
لكنني قانع بحكمة ربّي = روح(ن) بريّه شلّها باريها
يالله إلى الفردوس لعلى تضوي = والقبر روضه بالزهر تكسيها
يارب عسى في الآخره تشفع لي = من جملة السبعين لي تحويها
وختامها عالمصطفى باصلّي = عد ما برق برّاق في منشيها