[الواقعي]

بدع الاخ منيف تحت عنوان ((اصواب ماتبرى)

بدعنا يالمقرم والذي فالجوف به ادرى=عظيم الشان سبحانه مسيّر دورة الاكوان
هواجس واجده تطري تحد قلبي على المسرى =يقطّبها خطم ماتقعده شي سلسله ورصان
يسابق طايرات الميج والشاصات فالصحراء=وفي لمح البصر يبلغ بلاده لا ذكر لوطان
يحن المغترب لرضه ويتشوّق لكل ذكرى=روابطنا بها مثل الورق يالذيب والعيدان
خلوفة عاد تحتل في فوادي منزله كبرى=محبتها بدمّي جاريه تنبض بكل شريان
ثراها مسك واحصاها جواهر مملكة كسرى=وماها من عسل واما هواها الفل والريحان
بأرض المملكه لي مغترب ماقارب العشرى =من السنوات عدّت كل ابوها في شجن واحزان
وحال المغترب هي هكذا اصواب ماتبرى = وبلسمها يقع في عودته للأرض والخلاّن
وانا ساهنت قبل العيد هذا تأتي البشرى=ولا جت ليد عالجنبيّه اللي راسها صيفان
بنص المعنقه نشبت . حظوظي هكذا دبرا=ولكن باصبر دام ان صبري لي يظل عنوان
ويصبر عالعثر في ذا الزمن من سار فالغدرى =ويسرع بالخٌطى لا شاف نور آخر نفقها بان
وقع مكسر قوي يالواقعي فالسّوم ع محرى= وشل الطين كلّه والمضالع واكبر الحصيان
وقاع الشعر لي كانت زهر شفها غدت غبرى=وحتى الصقر شد منها وشد من حدها سرحان
وماذلحين لا عامل عمل لا ذاريه تذرى=وحل القحط ع مولى المواشي واكثر الحرثان
ولا حنّة رعوده وسط طاهب انتكس حدرى=وهنْوَه للشبامي بالمطر غنن له الرعيان
جسم ارضه ومكّن فالضمر وامسى على المجرى=وطاول ع السوام الهافيه والقى لنفسه شان
بغينا سومها يرجع ونبغى خطها يُقرأ = ونبغا خرسها يالواقعي يرجع على لوثان
ولا نبغى العمى ياصاحبي يتصمد الجهراء=كفاها الله ماجاها يبيّت دمعها معيان
وهذي غرستي حطّيتها في قاعها الجدرا=ولارويت بماء ماعذر تدني بالثمر لغصان
ونبغى جنبها ياصاحبي غرسات جم اخرى=من انواع الفواكه والعنب والتين والرمّان

جوابي على الاخ منيف تحت عنوان (نقش الانباط)

هلا بابيات من شاعر جواهر للوسل تُشرى=حروفه مثل عقد اللول وابياته ذهب رنان
مزخرف زخرفة لنباط لي منقوش عالبتراء=يضاهي ف الفخامه معبد الأغريق والرومان
كلامه مُقتبس من قصّة المعراج والأسراء=وتشبيهه جُمل من مُحكم التنزيل فالقرآن
أذا وصفوا رموز الشعر أبو سالم من الأمراء=ولو ما كان أبو الطيّب فهو شاعر بني حمدان
وفي وقت الشددّ لصحاب لازم ذكرهم يطرى=فهو عندي مكانه لم يزل فالروح والوجدان
نشد عنّي وهو عارف بيدي خيل بن جخرى=ويعرف خيل بن جخرى أذا صالت في الميدان
معي في مُعظم البلدان مبعوثين يا سُفراء=وملقي جيش لجل الأمن وافراده من الشجعان
نمور الشرق عارفهم وقوم القاره السمراء=وصاحبت الهنود الحمر هم والروس والطليان
على واجبك وسط البحر خليت السفن تفرى=وجبت اخبار لي غابوا وطهموا في غبب سيلان
مذابح واجده وقعت بشاتيلا وفي صبرا=وهذا اللي بقي من بعد ما قد رحلوا الشيبان
ولو شربت حجّل عرشان ماتلحق ملا المُصرى=وبعظ الذبر يتجدّر اذا قد ماتوا الحرثان
تبعت القرو والنوّاب يعرف وجهة الأقرى=وصدت الفرق لي يلقي بغيّه من عسل جردان
شبام العاليه يا خوي ماشي مثلها الصفراء=وسمّوها (أم اليتاماء) اهلنا في قادم الأزمان
سكُنْ فيها وعش مرتاح لكن شف لبن لمرى=قنع ما با تصيده غير عند البدو في رهطان

[/QUOTE]