مززززز تشتهي في القبر مزّه

[بن صران]

مز . تشتهي فبي القبر مزه
مالك والكلام الفاضي والدعايات لي يبثونها المتشدقين ولي بلا مهره ،، يقولون التدخين مضر بالجيب والصحة يصدقون كلام بعض الناس
مز تشتهي في القبر مزه تصدق انا من سني ثلاثتعشر سنة وانا نمز عبرت على كل انواع الصقارة والتمباك والمضغة ، والحمدلله ماشي ناقص علي الجيب عامر والأمور سابرة
صحيح انا أصرف كل يوم مأتين ريال قيمة الصقارة ، يعني سته ألف ريال في الشهر فقط ( صدقونا فوق نص الراتب بقليل فقط) لكن ذا ما يساوي شي مقابل نفخة دخان وانت بين الرجاجيل في باص أو تكسي أو دكان ... وتساوي آه السته ألف عند جلستك في عزومة الخالة والصهور حد منك وكذا وحد منك وكذاك وانت جالس حاط رجل فوق رجل وخليها كما الغيمة فوقهم ، وخل من با يكح يكح ومن با يختنق يختنق ... حرية شخصية ولا لا
وانتبه تفكر في لبن العيال أو في ارز أو البر أوغيره ... ياخي خل الحرمه تنزل تشتغل ( ماهي نصف المجتمع ) تخيط ثياب .. تغرس بصل عند حد من الفلاحين . المهم تساعد في مصروف الدار .. ومززززززز تشتهي في القبر مزه
وعاد ما يجيب الضيق الا لي يقول الصقارة تضر بالصحة .. سرطان .. أمراض قلب ومنها الخرطان الفاضية ...
مانا لي قريب أربعين سنة مزاز ولاشي حصل لا سرطان ولا شرايين والحمدلله القلب مثل المكينة شغال .
صحيح نبيت نكحكح ولاشي نوم يجي لكن مان لوحدي الحرمة تكح والبنية تكح وحت ى الزقر الصغير يكح البيت كله يبيت يكحكح ولا يمزون ولاشي
.... صحيح نحس بتعب لاقدنا نطلع الرقاد ..... ونتعب في العمل ما أقدر رص الملفات في الرفوف العليا وبرضه يتعبنا موضوع ثاني ما باقولكم به من شان ماتزعل أم العيال ( خلو سر) لكن أيش علاقة الصقارة بالتعب
.... وصراحة أنا محرج من الحرمة .. دايم تربزنا وتقول خلاص أثمك خام ولا منك لاشغل ولا مشغلة ولا مردة فلوس ومن كثر كلامها رحت الآ عند طبيب ويالله قلت له بالسبب ... طلعنا على ميزان .... وقال وزنك أقل من وزن كرتونين دجاج ( مع اننا أحسب نفسي رشيق ولا شي فايدة من كثر اللحم ) ... طيب يادكتور والحل ؟؟ قال بطل التدخين ...
أيش علاقة التدخين بالكلام ذا ؟؟ الصقارة تدخل من الفم والمرض من تحت لكن أه باتقول في أطباء ذا الوقت
هم با يقعون أحسن من أهل أمريكا لو هم يعرفون أن الصقارة تضر كان ما صنعوها وارسلوها لنا
المهم العفو طولت عليكم باقي معي بيت شعر قديم بس وباقوم


قال بداع القوافي كل من عمّر يمز
بوري التماك عندي خير من صحنين رز

يالله كيه واحد يمد أيده يعاون معي باقوم ز نسيت ما قولكم أنه حتى المقام يتعبنا
ومزززززززززز تشتهي في القبر مزّه

[المدودي]

يا سلام يا بن صران :p

ولا يهمك من قال التدخين مضر .. بل شف تبطيله هو اللي يضر


يا سلام

لا تنسى تكثر من مثل هذي المواضيع لعل بعض الناس يستحي على نفسه من اللي مسويه في نفسه

وكلمتي للمدخن :
نطح يا ثور وكله على قرنك

[بن صران]

والثيران ما شاءالله عددها كثير يامدودي

[الشعف]

ياحيابك يابن صران في السقيفة ... وباين عليك مريعوش

ويالمدودي شف مثلك بايكثر المناطحات بين الثيران .
احسن لو تغيره الى : على قول المثل :
الحصى من القاع ؟؟!! والدم من راسك
[marque]( كل عام وانتم بألف خير ) [/marque]
وتحياتي لك ولـ بن صران ,, وكثروا من مواضيعكم المرعووووشة

[بن صران]

عيد مبارك ياحلان السقيفة جميعاً
شكراً ياشعف
وكله صحيح
نطح ياثور وهو على قرنك
الدم من راسك .. والحصاه من القاع
وايضاً : ما تلقيه أم سويد في ديمها

[سالم محمد بلفقيه ((الشرقاوي))]

التدخين ضار بالصحة ويهدر المال 0