بدع/حسين بن حامد المحضار الموجه / لسالم باشعفين الحامدي

[صقر الوديان]

وهذا بدع الوزير الأول لسلطنه القعيطيه / حسين بن حامد المحضار .

الموجه إلى الشيح / سالم با شعفين الحامدي .

يا مستجيب الدعاء يا ذو الجلال = أطلبك وأدعوك ياجزل الهبات

تصلح لنا العاقبه في كل حال = وتحسن الخاتمه عند الممات

ولا تؤاخذ علينا بالعمال = تمن بالعفو لأهل السيئآت

ولا تحجنا لحد طول الليال = وتجيرنا يا صمد من قول هات

نجآت خير الورى مولى بلال = محمد الطهر محمود الصفات

صلاه تغشاه تعداد الرمال = والذر والنمل وأصناف النبات

كم لي تفكر وليل الهم طال = مرت ليالي علي سهران بات

أفكر ودير التفكر والمثال = في ما جرى من حوادث مشكلات

أحوال ما هي على خاطر وبال = تجري ولكنها وقعت وجات

من العمودي عليه الله قال = زوال وأمسى مطارد في الجهات

لا حول من ذي المصائب والهوال = ما با عليهم محبه في الذوات

سبقت وقد لي قرابه وإتصال = بهم ولا سخى بالحيا هم والموات

وأضرب بالإيمان معهم والشمال = حل الطلابه لهم والغنايات

واليوم وقعت وقدها في التفال = وقدر الله عليهم بالشتات

وما لنا في القضاء قدره بحال = العفو مطلوب من كل الجهات

ذا شور من هو وقع عاثر وقال = تبعوه وأعقب عليهم بالفوات

من المشيخ مقاطيب الحبال = تبع هوى النفِس ما عنده ثبات

وغره إبليس صور له خيال = وهو مسكين في سكرته بات

وساعدوه المشليخ عالضلال = ولقوا لهرجه سماعه وإنتصات

وقالوا الحال واحد والمقال = على طلوع القعيطي لا يبات

في أرضنا ما بغيناله حلال = وبا نسوقه بدحن الشاميات

والزاد والناد معنا والرجال = وصيحوا في القُبل وأهل الجهات

ونكثوا العهد ما قالوا وبال = النكث في العهد قدهم في الغوات

في يوم واحد بدوا باربع خصال = من الكبائر مصائب موبقات

ونكثهم با دهم جاب الزوال = لهم ولا أسعدهم الله بالثبات

خرجوا في الليل إنطردوا ذلال = من الحصون الزبون النايفات

ما رنحوا في المنازل للقتال = الجيد في منزله ظلا وبات

والبدو ذي عارضوا رؤس الجبال = بغوا طمع سا هنين الغاليات

وقع لهم فعل ما يخطر ببال = با يذكرونه إلى يوم الممات

ظلوا خبب عالمرابي والرمال = فروا شبيه الطيور الحاميات

وتابعتهم يوفعه كالجمال = تقول هِيّج تهادر باللهات

وشبتروهم بزينات الصقال = والوميه والسيوف الباترات

با روتهم فوقهم ملقي ضلال = ظلى وعاده لهم في السابقات

الجود والفعل عاطول الليال = ويدحقون الحدود الضيقات

والنصر من هو معه طا لعه طال = ولا يهمونه أهل الترهات

وللقعيطي صفه في كل حال = زانت ودانت اهم بالطيبات

وساعد النصر يوم الله قال = وأمست وحوشلخلاء له طايعات

وبعد قم يا رسولي في عجال = وبلغ الحامدي هذي البيات

تلقاه في ديوريفي قصر عال = محلت أهل الهدى نسل الهدات

في بيت محضار لي ماله مثال = زانت صفاته وذاته خير ذات

وقل له الشهر يا سالم هلال = والعيد هذي السنه عالناس جات

عجول مخا هي على خاطر وبال = مقدره ساقها جزل الهبات

وعمت الناس مره عن كمال = وصب غيث الهنا بعد السنات

وجود خصبه وهطال السبال = خايله روس الشعاب المفرعات

معاد شي عذر من صافي زلال = شربه هنيه تقع فيها نجات

الناس بعد الشدايد والنكال = والذيب والشاه في مرعا يبات

وباتشوفه إذا لك عمر طال = سرت وإلا أنشد الناس الثقات

والعفو يالحامدي في كل حال = وإنشي كليمه غلط في بيت جات

بدل بها والجواب إرسله حال = يصل إليكم كتابي لا يبات

ولا بغيت القصيده والمقال = ذلا حليله وهاجس قال هات

والختم صلوا على بدر الكمال = محمد الطاهر محمود الصفات

وآله وصحبه مراجيح الرجال = عليهم أزكى السلام أهل الثبات

تمت