حنين للوطن قصائد للشعار احمد باقديم وسالم بامعس

[مرعي بن صالح بن سميدع]

قصيدة للشاعر سالم بامعس
حنين للوطن

ياعبيد ان عاد شي حيله تبصر بصر=قم شلنـــا لا مطــارح ربـــــت الحـــانيات
خلاص يكفي علينا ما عبر قد عبر=سنين عبرت عسى عيضه في الجايات
شف لي سنة في سنة راحت عليا هدر=مشتاق للارض بيت سامر الزاهرات
مشتاق للارض ذي ربت جلال العجر =ربت رجاجيل فيها كاملين الصفات
صبروا عليها وقاسوا برد فيها وحر=والامن صنعوه والقوله نوب حربيات
لا ذكرتهم ما يجيني نوم يا خو عمر =والعاد عيضه بهم من دون ما فات فات
كل ما تحسيت دمعي من عيوني مطر=على مطارح مست من بعـــدهم محزنات
ومن خلفهم تعذب في الزمن وانقهر =وضــــــــاق حاله وفرمنهاومن مات مات
من بعدهم قال بو مبروك عزمي قصر=ولثقيلة معاد باقاطر المني بات
هذا وقم شلنا ما من عليها عمر=الا وجابة زمانه خل كســـــــــــب المئات
ذي يبكر الصبح بالحمرة ويوم المطر=لا نظرت بالعين شفته تبرد الحنيات
كمن وكم غصن داني بالورق والثمر=لاوصلك ظله معد تندم على ذي فــــات
لا تضيع العمر وتقضية كله سفر=وتحرم النفس من اعتومها الهانيات
العمر اثلاث فيه احسن ثلث قد عبر=والله يطيله ويحفظ طيبين النيات
لا سلمت يا الموت ما خليتنــــي يالكبر=والوقت غدار لا تكــــــــــثر من الامنيات
ياريت حد طير لتذكر بلادة يفـــــــــــر=لا هزة الشوق حــــــــــوم عا بقع غاليات
عاروس دوعن ووادي عمد وارجـــــع عبر=عا صــــــــــــــــوط بامعس فوق احصونه الحاكمات
عاروس حسيات وانعيمة وطاف المقر=ميح على الشعب فوق اغلوبه العالــيات
حضرموت الحبيبة طاف بحــرا وبــــــــر= ونكس بوديان تروي عتومها ســــابرات
وقم شلني قبل ما الحالي يبص او يقر=او ما عاد تلفاه لا هو في شجر دانيات
والختم صلوا عدد ما حاج حج واعتمر=على محمـــــد واله طيبيـــــن النيـــــــات

وهذه قصيدة للشاعر احمد بامحمد باقديم مرسله للشاعر سالم بن احمد بامعس

طرحني رؤس شتنه يابساط الريح ومجمل = مقاطيني وانا عارف طرقها والجبال السود
وعارف غيثها لا غاث فوقي واسبل سبل = سقى الظامي وحط قوت العذيبي في الشذب والعود
خلوفة عاد مسقط راس لي فيها ولي معقل = وكم من شعب وادية وحصنه يدفي المبرود
تجرعنا المرارة في السفر والعيش في معزل = من الاوطان واديار الحضارة والكرم والجود
ومثلي مثل غيري في المهاجر عاش يتنقل = ولكن لا تذكرت الوطن راسي يحن وينود
لنا حكمه ورحمه في صميم القلب يتغلغل = تساندهم ليونه في الخواطر تكسر الجلمود
ويكفينا كلام المصطفى في ربطنا والحل = وما خبر به االهدهد الى سليمان بن داؤود
معك خذني وانا عدني مخف من قبل لا تحمل = ومن قبل المسافه تقترب والعود يزقب عود
عسى يوم اللقاء نقبض كتاب احسابنا معدل = ونظفر باللقاء في يوم لا شاهد ولا مشهود
بحق المصطفى وبحق من شهد ومن هلل = الى وردنا على حوضه يتم القصد و المقصود
وشربه هانيه ماشي ظما من بعدها يحصل = من اليوم الذي ننهله لما يومنا الماعود
وثم قال الذي فكر في المخرج وفي المدخل = ويعلم علم واضح ان من بعد النزول اصعود
حسب يالادمي راجع حسابك قبل لا ترحل = ومن قبل المغطاء ينكشف يا كا سبين الجود
وياحيا وسهلا بالخبر ذي جاني مفصل = وذكرني مقاطيني محلت اهنلنا واجدود
انا عاشق في تراب الوطن حاضر ومستقبل = ولو اني تركته قبل نطعم ثمرة العنقود
وغادرته وعدني خيب بامور الوطن يجهل = ولكن قوة الايمانت خلتنا اليه انعود
رساله جاتني بالهاتف الجوال تتنقل = كما الساري الى دلهم وصب واملا كرف واعدود
وانا بدوي الى شفت الكرع عالجول يتزقل = نسم خاطري واتعافيت لوني عالوقا مارود
ومهما فرقة الاوطان طالت والسفر طول = الى قد اذن الرحمن لا موطن هلي باعود
صقع من ذي يقولونه في الكرنيش والمحمل = بلادك حيث ترزق لا محل مايولد المولود
انا خالفتهم في الراي ومدحت الوطن اول = واخر رغم ما قاسيت من مسعد ومن مسعود
فرد يا طير ريشك عاليمن من حجر لا عندل = ومن مارب الى ريدة بني كندة ومرقد هود
وحوم عالجبال السود من حيث الدهم يجفل = نقص اثره وهو غابش وضاوي في صيق واحيود
ومن تحت الحيود النايفة سلم على من حل = وحط ساس البناء ولدار كعدر بالحجر والعودج
لهم مني تحيه وردها مقطوف من مشتل = زهورة والشجر خضرا سقاها بالكرم والجود

وهذه القصيدة جواب من الشاعر سالم بامعس

على طين الوطن والعود يا باقديم لا تسال = سال لو بتسال عاهل الوفا واهل الكرم والجود
ومن حب الوطن وسط الوطن يجلس ويتقبل = مشاكل موحله وايام غبرا او ليالي سود
و لاجاتالتقيلة لثقل يبرك ويتحمل = وبين الاهل يتجمل يقع رافد ولا مرفود
ورزق الحي ياتي من وسيع الفضل يتسهل = الى خصل بشي لا يحجبه حاسد ولا محسود
وديره با تهينك وانت حر من قبل لا تنذل = سرح في الواسعة خطم جمالك واطلب المعبود
وبعد العسر يسر وتلك ايام تتداول = نظر بالعين شف ياكم وكم قائد صبح مقيود
وذلا قول من باقديم خلا هاجسي يزعل = يذكرني صروم البدو ذي هم في الجبال السود
وذكرني بلادي ذي بها لي نفس تتأمل = يعود الخير فيها ومن سلم لارض الوطن بيعود
ولا ياريت بعض الاودية لاياحمد تشتل = نعم باشل دوعن هو طينة والحجر والعود
من الغربة تعب قلبي ولعد لي نفس تتقبل = لأن نفسي سليه وسلا بابه صبح مقلود
عفا الله زام جزعناه في الوديان نتنقل = شهر وسنين معدودة ولكن خلص المعدود
بغيت الفائدة ضيعت راس المال هل يعقل = سراب الجول خلانا نضيعها كرف وعدود
ونترك ما كسبنا من زمن واقفاه نترحل = وهو غالي ولا يبلغه من عنده ذهب وانقود
جبوح النوب ذي تصبح على اشذاب الزبد ترقل = دواء للناس فيها والوسل ماجود للمارود
وهو من صوح ذي علوبه شبب تفرش كما القرمل = لها حنات في الخاطر وقلبي له يحن وينود
ولا باقول شي فيها صحاب الربط واهل الحل = وهي فيها مثاوي جم نمارة قاطنه واسود
ولاقد زمنت بمشي على عجزر وباتوكل = الى القرية الذي فيها تركت الجهد والمجهود
نعيمة تاج راسي قريتي ياموطني لجمل = برود الحال فيها من ماثر اهلنا واجدود
وبختم بذكرك يالذي يوم اللقاء تقبل = شفاعتك عسى تشفع لنا في يومه الماعود

وهذة قصيدة ايضا للشاعر سالم بن احمد بامعس

ذا فصل قم يا رسولي لليمن لا خضر = شل الرسالة معك بالجود والاحسان
على عاصمة سام سلملي ميت مخطر = على المحبين ذي في الاصبحي حلان
دبرت من عندهم والعين تغرغر = ما حد يفارق محبينة وهو فرحان
ذلا المعيشة تخلي لإدمي يجبر = على فراق الوطن والاهل والخلان
ويفارق الارض ذي راسه بها يكبر = ذي لا ضواها يبيت خاطرة ميدان
سلام مني لها ذي بعدها اثر = خرب مزاجي وخلاني كما الحيران
لا زرتهم قم وخذ جولة على البندر = بندر عمر من بروم العز الريان
سلام مني عدد مليون بل واكثر = على الناس في الديس والقارة وباجعمان
وبعد لا انت تبغى الراس يتسمر = روح الى الديس من القاطع شرب فنجان
وقلهم بغيت دوعن قبل ما يغدر = الليل مشتاق لك يا خيرت الوديان
لا سوط بامعس مع رسالة من المهجر = سلام فيها على ذي حضنت الشيبان
ارضي عزيزة وفيها باهي المنظر = ذي هو فراقه براء لحمي من العظمان
قله حرمنا الزمن مقعدك والمسمر = لا حل لك يا زمان الويل والحرمان
ذي من سنه لا سنة والوضع يتدهور = ولعاد ضنيت با يرجع على ما كان
الجسم عندي ضعف والراس قد غبر = والقلب عائش مبهذل في نكد واحزان
والذكريات الجميلة عادها تذكر = ماتنتسي ذي معك في روضة الخلان
وقله العفو وسمحان لا قصر = لإن الزلل والغلط يتعرض الانسان
وانا مابودي ترك لايمن ولا ليسر = ذلا نضرت الزمن يهبر على الشجعان
والوقت ذي هو على الجاويد يتعثر = هو ذي كلفني نسيب العتم والمعيان
وفي النهاية لمن ينشد ويتخبر = سلام مني كما الماطر من القنفان
بلغ نعيمة عدد ماعودها خضر = وما حنت الجانية على الزهر والعيدان
لولا ظروف الزمن ذي خلتني اتقهر = ما باخرج منش يالجنة الى النيران
ذا ذي حصل عند بو مبروك واتيسر = وبغيت من بن علي صافي في الفنجان
ذي هو كلامه يسر البال والخاطر = بتقول جاء في قروفه من عسل جردان
وارسل لقرموص نسخة لاجل يتذكر = نوب العسل ذي يبيت في الجبل حنان
كل ما ذكرته يبيت هاجسي ينهر = ذي ماتخطم كلفه الوقت على الخطمان
غلق مدادي وعاد هاجسي يتهدر = بإحسن رسالة لكم يا فارس الفرسان
فيها تحيات مخصوصة لبو جعفر = ذي هو على البال دائم واغلب الاحيان
قله حكم الزمن على الجيد يتقدر = ولا حد يرد المقدر من عظيم الشان
صدام روح علينا الكوكب الزاهر = وروح العز والغالي علينا هان
وصقورة الجارحة في الوقت تتصقر = يا باطل البطل لا شفت العزيزانهان
واحفاد صدام ماحد منهم قصر = وهكذا سجل التاريخ لشجعان
والختم صلوا على المبعوث سيد البشر = محمد المصطفى الهادي ولد عدنان

والشكر الجزيل لأخواني احمد بامحمد باقديم وسالم بن احمد بامعس

وتقبلوا تحياتي

اخوكم مرعي بن صالح بن سميدع