قصيده مرسوله لي من الشاعر الكبير/صالح بن محمد بامعوض المشجري .ويليها الجواب..

[صالح بن احمد المشجري]

قصيده مرسوله لي من الشاعر الكبير /صالح بن محمد بامعوض المشجري.ويليها جواب له مني عسى ان تنتال استحسانكم.

البدع/صالح بن محمد بامعوض المشجري

الف مرحيب جاء قافي مثيل الزلالي =يشرح الحال من همه وزال الشكية
ريت ذا صدق ماهو حل ولا خيالي = بايطيب اللقاء من ود ماهو نحية
ياسلامي على صالح عداد السبالي = دي جهامة قوي والرعد راس النشية
كنت مرتاح في دنيا ولي قلب سالي = مطمئن بالوفي سبحان رب البرية
واعرف الناس من زايد ودي هو مثالي = والذي هو أقل مني ولي نفس حية
كن تالي زمن يارمح زيد الهلالي= مايعيشون في دربه سوى خباث نية
بيسقونك من القير وله طعم حالي = عالسانك وحط في البطن ماغص أذية
وإن تبا الا وفي جيد خباث العمالي = مالهم عهد والحسبة لدنيا دنية
خوي في الوقت بن عمي عليه اتكالي = لا دعيته قفا ريته يرد التحية
مايودي حلاله حيث يذكر حلالي= وان تبا كاس ماء مامد شربة هنية
ياحسوفي وياقهري وياضيق حالي = ياحسوفي على عاداتنا الاولية
والقضاء بالوراثة في صحاب المعالي = حيث نطرح علم بي حط ثلاثين كية
حط لوحات عالهجري وداخل زوالي= دي يزول صحاب الحق واهل العنية
صاحبي دي صلح نفسه وناضعت تالي= يوم سوى لنا في الوقت ذا مسرحية
خابت امال في نفسي وخابت رجالي = يوم كل تبع نفسه وبصر البقية
ضاع كسبي ومالي ضاع يابن الكلالي =ضاع بين البيع ذلحين والمشترية
جيت باشكي على غيري بهمي بكالي = والعرب كلهم يابن حمد مشتكيه
وانت باسالك ياصالح ورد عاسؤالي=لا متى الذيب يلقط في الجذع والثنية
عاد حد بي رحمني ليل أو بي رثالي=أو غدى الفيل في الغابة وكلا نسية
بير برهوت ماله قاع والحيد عالي = لو تسيل الشعب من شرقها لا عشية
شلها من شعاب الكار لما الرمالي= شل وديانها هي والفروع السقية
ليش ياقلب حاقد في مجالك ووالي= ليش مت خاف من ربك وترحم شوية
كيف مت خاف من والي على عهد والي = دي هلك عاد بافعاله وفرعون زيه
منتقم في السماء جبار ماله مثالي= بيده الملك والتصريف وحنا الرعية
وقت مكروه من شره معدلي مجالي = ردوا الناجحة في الخاذ ذلحين نية
تسع تعشر عدد بايامها والليالي= كل دقيقة كما يومين عندي بطية
مامعي فايدة فيها ولاراس مالي = والشقاوة تدور للنفوس الشقيه
في الميادين عز يادي خترت القتالي = عزلك عز من هذه الحياة الردية
وان لما بارق المرزم طراف الرسالي =دي رعوده صواعق نكت حل السرية
ماتهام المخاطر قال شاعر جمالي = عادها جمال في المرغاد فطر قوية
لامراحل بعيده باتشد الرحالي= وانت يانوب باتصبح جبوحك خليه

الجواب /صالح بن احمد باسد المشجري

مرحبابك هلا ترحيب غالي بغالي=عد سبال المطر دي في قنوف النشيه
يالذي شان لك عندي ومقدار عالي=يادواء البأس في دنيا رخيصه دنيه
ريتك الامعي دائم وشوفك قبالي=يومك الفيد والمكسب وكل مامعيه
هرج محكوم لي سقته بعيني يلاْلي=والمكاتيب عابنآدم من الله عطيه
صبرك اليوم عادنيا تبا قلب سالي=لا تقول الزمن والوقت جائر عليه
وانت مالك من الدسمال دي صنع بالي=مايناسب معك حل الدرك والسريه
حط على الكتف بوني شال زين الذبالي=حيث مالرجل شلت في طرق ملتويه
والخباثه لصاحبه ترد لا تبالي=يومه الفسل ذا طبعه ونفسه رديه
مايشير يخيرها بشين الفعالي= وان عطى ماعطى جمه تشوفه شويه
عادة الجيد يحسبه من اول وتالي=والعجيه ترد في الحال عنده بتيه
يصلح الشان مابين السفل والعوالي=وان دعاء نب للصاحب شروعه وفيه
وان تعناء وله مقصود في خبت خالي=حاز غايته والمطلب بهمه قويه
ريته الناس مثله في جميع الخصالي=والمقل والغني في حال واحد سويه
كنه الوقت دي محسوب عالناس والي=لا قسم ماعدل قسمته فيها نحيه
يوم كم جيد منه قال قصرت حبالي=وايش لي في زمن حالته حاله بغِيه
قبل ماكنت لي سمعه وطاعة رجالي=راح واتغير الماضي وانا المرجعيه
وايش لي في زمن طبعه يفوق احتمالي=مل صبري وانا قاسي ومالي دريه
بالخفاء وايش لي مكتوب ريته حلالي=حيث ماحن عاتربه بعيني نقيه
يوم وقتي عليه جار قرر زوالي=من مقاطين عيشتها معيشه هنيه
ذي بها خاطري يهدى ويستر بالي=في نظرها يزول الهم هو والاذيه
لي بها ربع ومحبين هم راس مالي=مني إسلام يبلغهم وماطر تحيه
ياثراء كن مقدارك وانا دوب صالي=في حياتي وكني مقترف شي خطيه
مارخص شان لك عندي تجي بالعلالي=ماقبل باع في طينك ولا قبل شريه
بعده يامحب باعطيك باقي حوالي=قرب البُن من يافع ومد شاذليه
يوم مجلسك عامر عند صالح ومالي=بالرجاجيل والجاويد واهل الحميه
عندك القشع يو حيدر وكمين صالي=عد محسن وعد يسلم وعد البقيه
بايجونك كما همام روس الجبالي=ماطلابته يجيبونه عتيه ضحيه
خل عمر لجل مايسعى بأرض القبالي=عارفه يطرح اوزانه كفف بندريه
شرق في المملكه حيث التقي والشمالي=من نشدته قبَل قال احتكم للقضيه
ذا عديلي وقوله مثل حد النصالي=يفصل الهرج في المجلس بحكمه ذكيه
قلتله خوي ذا عده وحسبت عيالي=تشهد احموم عاقولي مع المشرقيه
قاللي عذر وسموحه معك طاب فالي =دامها نيتك سمحاء ونفسك رضيه
قلتله حمد للمولى وبين ضلالي=واطلب الله لك بالصفح من طيب نيه
واختم الهرج واقوالي بسيد الرسالي=بخت من يختم اقواله بسيد البريه