لاميّة الشاعر: سعيد عمر بن مرضاح

[سالم علي الجرو]

الليل يا هاجسي سجّل بالقـلمْ = والشعر لك عادات تضرب به مثال
وخص به لي هم يفهـمون الكلم = ويعدلــوا الميزان لاشافوه مال
ذولا بني مـره يجـلّوا كل هـمْ = والخصم في قاموسهم ماله مجال
وأكبر مثل في يوم مالزاهم زهم = اتعـّوذت منهم شناطيب الجبال
جو من نواحي عمد لاحريضه وثم = خلوا المناطق مثل ميدان القتال
من سالف المري وطبعه لاقــدمْ =معاد يتراجع ولاقد قال قـال
كلمته يوفيها اذا ساعة عـزمْ = وادخل ميادين البطوله والنّضال
يشهد لنا التاريخ في كل الأمـمْ = شرق وجنوب وغرب لمان الشمال
قدامنا العملاق بايرجع قـزمْ = يخضع ويستسلم وهو شاجع وفال
من زام بن قمله وجيشه لي زهمْ = ورجع ولا حقّق مراده والوصال
كل العداء من بطشنا ذاقو النّدمْ = محال يكسب من يعادينا محال
وان حد غشيم العقل عاده ماعلمْ = يقدم اذا في الرأس قبل الميم دال
هذي بلاد اجدادنا منذ القــدْ = ماباتقع مسرح لكل تايه وضال
نحمي مناطقها اذا الازم لزمْ = وتـرابها مابانبدل به بدال
مادام عاد قلوبنا تنبض بـدمْ = من يعتدي قولوا له ابشر بالـزّوال
من ما مشاء حسب العوايد والقيمْ= ماظن بانسقيه من صافي زلال
ماله خلاف الذايبي مسموم سمْ = كل من سعف له بايكلّل به كـلال
لأنا على الميثاق جددنا القسمْ = من حين ماتلاقوا دحااااميل الرجال
من شوفهم بالغصب كل كافر سلمْ = من بعد ماجادل ولافاد الجدال
لك حق ياخالد تعلى على القممْ = والصقر مايعمد سوى روس الجبال
انته ومن سعفك وكم مثلك وكمْ = ماحد حسب في شمس والا في ظلال
شرفتوا الوادي بجد تشريف جمْ = وحضرموت اتشرفت على كل حااال
لان الشرف والعز دايم والقيـمْ = يبقى لنا مكسب ويبقى رأس مال
والختم صلوا عد زوار الحـرمْ = على النّبي وآله ودبّلهـا دبـال