بالعيد ذي عداء لفرسان السقيفة مرسله=وخص بن عكعوك ذي يبدع قوافي كاش كاش

[خالد بن قاسم]

السلام عليكم ورحمة الله وبركاته

الاخوان الكرام اقدم لكم ردي على قصيدة الشاعر الكبير
يسلم بن صالح بن عكعوك والذي وجدتها عصر هذا اليوم
بالصدفة ودون سابق انذار من شاعرنا الكبير بن عكعوك

اهديكم اسماء التهاني مملحة ومفلفلة=اعداد برق الصيف واعداد المناشي والطشاش
بالعيد ذي عداء لفرسان السقيفة مرسله=وخص بن عكعوك ذي يبدع قوافي كاش كاش
كل ماوصل من عند بوصالح لزوم استقبله=يامرحبا بالقول من مثله يجي ولا بلاش
نسم على حالي ونا قدلي زمن في بهذله=وحلان في هذا القضية من لقط فيها وناش
عشقتها قبلك ولكني قطعت المرحله=واعطيتها عشرين من عمري وهاوشها هواش
من شانها تحملت ذي ماحد قدر يستحمله=واهديتها واكسيتها بقماش من اغلا القماش
وكم تعاهدنا واقسمنا عهود امهلهله=من اجلها ضحيت بالغالي واعطيته بلاش
وكم تعانقنا وكم اعيادنا متواصله=وكم لنا ذكرى ونحييها بمتعة وانتعاش
وكم سجلنا مقاطع في قناة امفضلة=وكم صورنا بكمرة ديجتل عبر الفلاش
وكم ارفع مستواها فوق ما تتخيله=وكم كتبنا في السطور نقاط متبوعه بداش
وكم عطيها من ضماري سابقة ومؤجلة=وراحت اموالي لها هبشات يايسلم هباش
وانا الذي ضحيت وحسبت الهواء يامسهله=وانا الذي اوفيت ماحسبت ان عشقتها عفاش
وانا الذي صلح لها اشياء كثير امعطله=وهي تضوي لي وتغريني بانواع الطماش
عاهدتها عالصدق والقت لي حيل ومداغله=واصبحت اكرها معد باعيش نو ياها عناش
لان رعبوبه غشيمه جاهله ومغفله=قدها مع عشاق كم سارق وكم هواش هاش
كلن يجاملها وسوو في المحبه مهزله=من بعدها العشاق بالجمله ولا فيهم نطاش
ومن هنا حطيت عا قلبي قفول امقفله=يكفي من العشقه اذا قدها كما انطاح الكباش
قد خيرلي عشقة رفيقه والرفيقه لوله=باردها حتى قد اعظامي معد فيها مشاش
هي باترد الروح في جسمي بدون امجامله=وباتشوف اهل الهوا تصفيق ولا عاش عاش
من شانها بدحي ولا حتى الرجول امعقله=بطلع لها شمسان بادحق على روس الحناش
وبعد انا بحزيك من حرمه بزقر امحمله=في بطنها دايم ولا ينزل سوى الا بالخراش
وان قد نزل راحت ضحيه موتها يامسهله=والزقر اما مات ولا وثقوا رجله وعاش
ذا ذي صدر مني وقول الشعر ماحد كمله=حتى ابو الطيب عبر عمره وهو حاضر وباش
ومات ابو عامر وله عدة حكم ومفصله=والسيد المحضار ياريته ربع مليون عاش
وخلفوا اجيال حتى الماء بسرعه تفتله=مابيخلون الحبيبه في حياة الانكماش
احصونهم كمن مصبح والشرف يامطوله=من زام اول مايحلون المعارم والعراش
وفي ختام القول ربي بايحل المسئله=وبايديِّع سيل بيشل المظالع والجراش

خالد بن قاسم
تاريخ 21\11\2010