ياشيخ سيبان بعد الله عليك العمد

[(الحلتيت)]

هذه القصيدة قلتها بمناسبة أفتتاح طريق المكلاء -خيله والذي تبرعت به أسرة ال بقشان الكريمة0

أبديت بالله رب العرش واحد أحد=هو خالق الكون ماسوى لكونه حدود
وألفي صلاتي على طه عدد مارعد=وعد ماباتت الزرقأ تحن بالرعود
وأله وصحبه عدد كل فرد كافح وجد=أجدود ماتوا ولاحد مثل بعض الجدود
علي وعثمان والخطاب مثل الأسد=واليوم جونا ثعاله بعد ذيك الأسود
والأن باقوم باسلم على أهل البلد=عد المفاتيح وأعداد الخرز والبلود
وخص بقشان بوفيصل عدد ماوفد=مليار زاير خلاف اللي يجو في الوفود
ياشيخ سيبان بعد الله عليك العمد=ميزان من صدق كامل بالكفف والعمود
يشهد لك الله وأحنا كلنا بنشهد=والخط موجود قبل البينه والشهود
ليفي حويره ولي في حاح وأهل المقد=لصغير حبك وليهو عا بعاره يقود
وأصحاب دوعن وليسر كلهم والريد=سرحوا على الخط والمغرب يردوا ردود
وأحتلت المشكله بعد التعب والنكد=الله يحميه لي حل التعب والنكود
هذه مأثر لمن حدر وكل من صعد=يارجال سيبان بوفيصل مصعد صعود
يوفي كلامه ويوفي الوعد لاقد وعد=ماهو كما الناس ليهم يخلفون الوعود
سوى مخطط على راس الجبل بن حمد= فيه العماير تشابه لي بشارع حمود
فيه المدارس ومستشفى ونقبه وسد=كلين يشرب بحفنه من مياة السدود
ذا شيخ من جد دايم للقبيله سند= في ساعة الضيق يطلع كل شي في سنود
ياعد تجري وكلن عاعتومك ورد=من كار سيبان لاجده لحي الورود
يالله تحفظه دايم من عيون الحسد=يالله عسى عود يحنب وسط عين الحسود
والأن يالهجس بالناقش أمور البلد=بنشوف ليهو مخبأ في الظمر والبدود
من بعد ماغبت يادكتور ياباعبد=ورطت ورطه كبيره في مشاكل عبود
لاجيت نا بنتقد قالوا هرج وأنتقد=ولعاد تفتك سوى بالواسطه والنقود
وان كنت واقف يقولوا ليه ذا ماقعد=يتشاطفونك كما لحم البقر والقعود
وأن جيت تقرد من الشجره كما من قرد=جاتك غرلأ وصلتك الذيب والقرود
كمن مسالم تعذب في البلد وأنجلد=أمن البواكير قدنا مثل سو الجلود
هذه حقائق ويمكن فوق هذا زيّد=ماشي فوايد ومكسب منكم يالزيود
لاقلت طيّب طلعلك شخص قلبه سود=ورجعت مرعوب من حنشان حمراء وسود
وأن كان واحد تمرد أوتشيجع وهد= الباش مرقأ يجوله كلهم واليهود
والحاصل أنه جراد أغبر علينا نهد=جانا من الصين والنيبال وأرض الهنود
والطبع واحد ولاحد بالطباع أنفرد=سكين ملقي وجنبيه وخمسه فرود
والمضبي الزين قد سرطوه هو والوقد=والغاز والقازوأشيا غاليه والوقود
والختم صلوا على طه عدد من سجد=في مسجد القدس واللي في المدينه سجود