12-16-2002, 09:11 PM | #1 | |||||
حال جديد
|
مضغه داخل الفصل وحد با ينكر المنكر
إييييييييييي !!!!! ياحلااااااااااااان السقيفه
عاد حد بايقول للمنكّر ! منكّر ولا خلاص من بغى شي في راسه يلقّيه انا البارح ضويت للدار تعبان هلكان ... نحصل الحرمه ترغي وتزبد كما الناقه لي ذبحوا ولدها آه بش يا بت الحلال ؟ إيش لي حصل ؟ قالت: ولدك . عادك باتشور بشي فيه ؟ باترّجّله ! باتخليه يقع صمصوم ؟ ( سبّرت باضحك !! رجّل آه ؟ الزقر أكبر مني.. ثلاثين كيلو في كرعانه . حسب وصف المدودي ) قلت : طيّب آه صلح الزّقر ؟ قالت : والله ماني داريه .. شفه له يومين ما يسرح المدرسه واليوم جات ورقه من المدير بغوك بكره تظهر عندهم ... يالطف الله ... المدرسه والمدير والزقر !! أكيد حد حارشه "" والزقر حار ما يجزع الذباب عند خشمه "" مصايب تتحذف علينا اليوم من الصبح سرحت قدا المدير ... وحصلت المدير في حوش المدرسه شال عصاه ويطارد الزقارين بين السواري حق البرنده .... مصوّع بنفسه بغى آه منهم . لي با يتعلم يتعلم ولي با يلعب يلعب :::: وانا مالي ، أنا لي في ولدي يااااااااامدير . إيييي ياأأأأأأ مدير ( إلتفت قداي ) وقال أهلاً !! عادك الا ذكرت سمع كنك يا مدير نحنا يوم عطيناكم الزقر قلنا خلاص با ننتبه لاشغالنا وانتوا با تصالونهم وباتربونهم وباتعلمونهم . ما درينا إنكم كل ساعه باتوصون لنا.. يوم ورقه .. ويوم ولد الجيران . آه معنا ومعكم ( المدير عيونه كبرن ورقبته إنتفخت... وعادنا ماكلمته . ما غلطت عليه في شي )...وذلحين جينا آه صلّح الوليد ؟ كل يوم وانتوا ملقينه عذر ! المدير قال : الناس يقولون سلام عليكم !!! لكن ماعلينا تعال دخل الى الإداره وبعد مراجعه وخذ وهت دخلت قفاه ... ودعوا الزقر ... هت آه معك على الوليد ؟؟؟ المدير : يارجال عيب عليك !! ذا عاده وليد.. سنه ذلحين سبعتعشر سنه وعادك تدعيه وليد ؟؟؟ ما علينا... ولدك الاسبوع ذا صلّح ثلاث مشاكل الأوله ( ضرب واحد من زملاءه ) الثانيه شعّق الكتاب حق المدرسه .... الثالثه بغا بايدخل الصف والمضغه في أثمه .... بس .. ذي الخرطه لي معك يامدير ( في نفسي ) طيب يامدير وذي تستحق انكم تطردونه من المدرسه.. سقل يتصافطون وعصر يد صاحبه لما مالت من الكرسوع ... أه فيها .... اليوم عند ذاك وبكره عند ذا . كتاب وتشعق ... بسيطه لفّه من اللصقه حق العدي ولا حتى ثنتين وصمّغناه ... أما المضغه ذلا في أثمه لا أنت ولا المدرسين با يضرهم شي . والهم أنا الحاجات الصغيره ذي يا مدير ما باكم تشلّون لها شان ودان ...ماهو سوى منكم الوليد في سبعتعشر سنه وعادكم مخلينه في ثالثه مع السقل الصغار .... ولد بو سراج دخل بعده باربع سنين وذلحين قده في خامسه .... مشوا حالكم وحطوه في سادسه ولا سابعه ولي بغيتو بغيناه !!! ماهو رشخ زقر ! شعق كتاب ! صلّح مضغه المدير سكت ساكت ودنّقس براسه ( عندينه إقتنع بكلامي ) والمدرسين خرجوا من الإداره والوليد ما شاء الله رافع رأسه ( فرحت منه ). المدير بعد فتره رفع رأسه وقال العفو منك ... شل ولدك وبكره بايقع الكلام الزين ياخواني ثاني يوم جات رسالة فصل للوليد من المدرسه !!!على إيش مانا داري ؟؟؟؟ عاد حد با ينكر المنكر حد منكم با يقوللي أنا غلطت فين ؟ والحليم تكفيه الإشاره |
|||||
12-17-2002, 01:53 AM | #2 | |||||
حال قيادي
|
مضغة
وفي الفصل لا لا لا طيب ماتخليها (سعوط) .. يازول ! |
|||||
12-17-2002, 02:33 AM | #3 | ||||||
المشرف العام
|
لاتعليق يابن صران اسلوب جميل ورائع ويخلق البسمه علىالوجوه وبصراحه ذكرتنا بأخينا المدودي اللي غايب عنا صار له اكثر من اسبوع اوزايد (عسى مااشترى شي ثاني من وارد الكنق دم ) هت من هذه الدرر يابن صران |
||||||
12-17-2002, 07:24 PM | #4 | ||||||
حال نشيط
|
لا حد يشتغب
ما اشترينا شي ولاشي ذلا عندنا عمال سرحوا في الدار وجلسنا على جالهم وعذرونا لو طولت غيبتي عليكم شوي ... والحمد لله اليوم حصلت فرصه مع الصبوح ـ حق العمال ـ وقلت با ندرا باخبار الحلان والمشرفين .. والحمد لله حصلناكم سابرين و يا بن صران انا شوفك مش غلطان ـ مش مجامله ـ الا هم الناس في الوقت ذا يشوفون الشعره ويخطون البعره وشفناهم ريتها الا مضغه سهل ... ما تشتاف يومها الا تحت البراشيم ـ الشفايف ـ آه با تفول في المضغه لي هي ملى (الاثم ) عاد شي اكبر من القات ؟؟؟؟؟؟؟ |
||||||
مواقع النشر (المفضلة) |
|
|
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
أخبار نادي الإتحاد في الصحف المحليه ليوم الثلاثاء الموافق 18 / 1 / 1433 هـ | سميرالنهدي | السقيفه الرياضيه | 2 | 12-13-2011 03:28 PM |
(طبق على المحبوب في داخل النون) | بايعشوت بالغربة | سقيفة عذب القوافي | 11 | 10-06-2011 01:56 PM |
خادم الحرمين الشريفين يضع حجر الأساس لأكبر توسعة للحرم المكي الشريف (تقرير بالفيديو) | ابو سراج الهاشمي | سقيفة الأقتصاد وقضايا المجتمع | 0 | 08-20-2011 04:29 PM |
ماشي وجد قايد أمين..؟ | الوحدوي | سقيفة عذب القوافي | 12 | 11-13-2010 04:34 PM |
الجنوب الجديد (66 سؤال وجواب) للجنوبي / علي هيثم الغريب، | حد من الوادي | سقيفة الأخبار السياسيه | 0 | 10-29-2010 12:35 AM |
|