مساجلات الزامــــل الشعبي

[سبع الليل]

كل من سرح للسوق خسر وألا ربح=والوعل بوقرنين عا راس النيوف
شارد من الرميان ما بغاء ينفضح=بوطير عا راسه ونجمه عالكتوف
ان شي معك لي قول باشرنا فصح=هت لي خبر في الجبح ذي فيه القروف
موشح ودار الراك موسمها برح=والعاصمه صنعاء تحذف بالالوف

[سبع الليل]

اليوم يوم السُعد والحظ القوي=يوم أعتراف المفتريه والجناه
أخبار سرتنا وسرت خاطري=في حومة الميدان حاصرنا العصاه
لكن جرح القلب عاده ما بري=ما دام عاد الجرح باتنزف دماه
وأيش عادنا باقول شي من بعد شي=الفقش يالاصحاب مايكسر حصاه
نحن معانا الله مولانا الغني=الواحد القهار جلً في علاه
يعلم بكل ظاهر وكل ماهو خفي=حتى دبيب النمل عنده والفواه

[مجمل]

بدعي على الهاجس يجي مايختفي = هاجس معي جيد يلبي من دعاه
مايعتذر لحظات بايدرك علي =لاقد حظر والله شف ماحد كماه
يالسبع للرحمن شفني بشتكي = بشكي لرب الكون ذي هو في سماه
شله من الكفار غلطوا عالنبي = كافر من كفار ربي قد عماه
ثار الفتن فالناس ذي ماتنتسي = لاكنهم ذلحين يسعوا للبداه
واجب لقاطعهم لعد حد يشتري = كل فرض بالدعي عليهم فالصلاه

[سبع الليل]

هذا الكلام الزين والريح الندي=هذا الوفاء والجود لي نحن نباه
ياريت كل الناس مثلك تعتزي=كان العرب في خير وافر وانتباه
البحر له يومين موجه ينطوي=والعاصفه باتقتلع كل الغزاه
ولعاد بايبقى سواء ذكر النبي=المصطفى الهادي على رغم الوشاه

[الوزيري]

ياللة يامن فوق عرشك معتلي=نسألك ترحمنا ونسألك النجاة
من بحريتلاطم على من هوتقي=والامر لة ربي ولانرجى سواة
ذاباب والثاني علينا نبتدي =في خط واحد مانخالف مبتداة
كل من فتح موضوع لازم نقتدي=ويناقش الموضوع كلن من قداة
والقافية لاتكون انتة معتدي=وتجيب ماقالوة اوتلقي كماة
واجب انا رحب بمعبد وادعي=انة يجيد الشعرمايخفى عطاة
مرعي عرفتة دوب في ربعة وفي=الصدق هوعندة وهذا هوخطاة
اما رفيق الدرب ذاك الاولي=ياريت شوفة بونمرعندي ثناة

[معبد]

ربــك اذا قـــد حب عبده يبتلى = مثل النبى ايوب حبه وابتلاه
سلط عليه الد ود لحـمه يبترى = لكن بعد الابتلا ربك شفـــــاه
وعــاد له ماله وكل ماقد فنى = ومن صبر لابـد مايلقى جـــزاه
واحنا بلا نا الله فى هذا الغبى = جر المتاعب لابـلا ده من غباه
لى بايهدم صرح عالى مبتنى = ياالله عسى ينهد عاراسه بنــاه
والختم صلوا عا الحبيب الهاشمى = لى خصه الله بالرساله واجتباه

[مجمل]

كلاً صفي جوه وجوي ماصفي =باتسمعوني باعطي صوتي ملاه
واسبابه الغربه مجمل قد بلي =خليت وادي قد سكنا في علاه
خليت وادي عمد ذي ماينتسي =خليت حصن الجد ذي شيد بناه
لكن ربي بايعين الحضرمي =غربه وراء غربه ولاحصل مناه
من بعد ماشفنا العراقي بوعدي =محتار مابين المحامي والقضاه
قلناعلى الله ذي في الدنيا يجي =والرزق من رب البريه والحياه

[البكري]

البكري قال بد لوي معاكم باد لي
و الكلام الزين ما عندي سواه
عشت عمري كله في بلادي سلي
ومن ترك بلاده دا غاوي غواه
دا عاش في غربه رجع كيسه خلي
ومن القهريبات نايم على شواه
كم نصحت مجمل ونصحت ابو علي
قالو علي مسكين هاوي في هواه


البكري

[عامر باتيس]

السلام عليكم ورحمة الله وبركاته

باتيس قال اليوم معي هاجسي قوي=حكم قوافي ولجلكم شيد بناه
قد جيتكم يهل السقيفه معتني=من بعد غيبه هاجسي عود قواه
معكم ابا حيث ما تهبو لولي=انتو سلا قلبي يصحابي ودواه
حكمت ضروف اليوم والوقت العني=هذا زمن ملعون مامنه بداه
نكد على حالى وعا قلبي السلي=بين الخساسه والنقى اضيع وتاه
ومولى المصايب والفتن بعده يلي=حير بافعاله المشايخ والقضاه
يادي عصيت الله وسبيت النبي= هذا رسول الله وذا قلبي فداه
مغصوب باتخضع للقول السوي=ولا سيوف الحق مامنها نجاه

[سبع الليل]

لا تلعن الازمان يالوجه الرضي=هذه حكم ربك وقدراته وقضاه
لكن قلوب الناس قدها تلتهي=تجري قفاء الدنيا وتعمل مشتهاه
وانت سمع مني وانا مابخفي=ذي بايسوونه العساكر والقضاه
ذي ما يخاف الله عدبه مفتري=يسرح ويمرح عامد ألا في خلاه