محاوله للتواصل { مغنى دآآآآن }>>>

[حاتم الطائي]

بالفعل ( يالباشق ) ترى حاتم في العشقه علق=واللي بلي بالعشق يتحمله لو هو ما يطاق
بس لي رجاء واحد من المحبوب .. لو عاده لحق=من قبل ما غرغر .. وروح العبد تبلغ للتراق
ليته يواصلنا وبعد الوصل ذا مانفترق=او موت احسن لي اذا هو كان عازم عالفراق

[حاتم الطائي]

القلب دق لجله .. وحبه دقدق العظمان دق=والبال من سبّته يا ( مبروك ) ما قد يوم لاق
والمشكله له قلب قاسي ما رحم حالي ورق=لو هو حجر جلمود كانه حس باحساسي وفاق
ريته يصارحنا يحط عالباب قفله والغلق=والا يراضينا وانا بفديه روحي والعناق
والقصد يا ( مبروك ) نبغى فصل مثل اللي سبق=كذ قالها الباشق : تراه القول في ذا الفصل ضاق

[مبروك بن ماضي]

ذا فصل والثاني( سـؤالي) وين حكام العرب = ماشـوف حـد . حتى الذي كانوا زمان ينددون
غابوا عن المسرح كأن بـغـداد مافـيها حرب= ولا لهم أخـوه عـرب في وسـط غــزه يُـقـتـلـون

(والجامعه وآمينها) صارت كما البيت الخِـرب= كله سببه الناس ذي كانوا زمان يْخربون
اهل (الحبال السود ) هم جابوا لامتنا الجرب= تبعوا لهم (بقره) وكم لعـبت بهم ام القرون

[بوطارق]

هكذا ياشباب
امتعونا بالجديد والمفيد

[المدودي]

تسأل عن الحكام يا مبروك .. ذولاك الخَيب = حبلي انقطب منهم لأمالي دوام يخيبون
ما يفكرون الا .. فيين اليوم يحيون الطرب ؟= و فيين با يمسون هم و اصحابهم و المطربون
ما يسمعون الطفل و الشيبه و صيحات الغضب = كل المهم شارون هو البوش بس ما يغضبون
لو با يقع بايدي نحط بوهم وسط محزم حطب = نرشن في الحكّام .. لي في الشعب عرفوا يحطبون
هم راس كل علّه في الأمه و هم خس الجلب = جابوا لنا العيبان .. باستمرار منهم يجلبون

[مبروك بن ماضي]

ماقوول غير الله يلعـن كل من كان السبب= ويخلص الامه من الحكام لي يتسابون
منهم شبعـنا يالمدودي .. كذب .. تـنـديـد .. وخطب= لما متى ننصت ونصمت والجماعه يكذبون

احترامي

[ثابت بن ماضي]

عندي أمل في الشيخ ذيهو عل مبادي مصتلب=أبحكمته والعقل بايحط القذا في كل نون
وعنده عياله كلهم فرسان في وقت الطلب=وأعيال عمه لاهراء في الضيق وقعه بايجون
الله باينصره لأنه من عدوّه مرتهب=وقارع جيوش الكفر وهدم حصن من خير الحصون

[مبروك بن ماضي]

كلام حكام العرب يالشيخ (تذروه) المهب= ياماسمعنا منهم والمشكله مايصدقون
ياما وياما من موال الشعب والامه ذهـب= لكن عزانا انهم واعوانهم بايذهبون
ماحد على الدنيا مخلد من سرق ولانهب= في الاخره نيران من ظلموا بها يتلهبون

احترامي

[مبروك بن ماضي]

ذا فصل والثاني على المغـنى تعالوا كلكم = مابفرح إلا لاسمعـت الدان والشعراء حضور
الناي والمدروف والمزمار جبته لجـــلكم= والعـفـو منكم لا حصل من عـند بن ماضي قصور

بانتظار مشاركاتكم

[طالب النعماني]

سلام من عندي لكم ياهل امعزه والكرم=تاريخكم بالجود بايشهد على مر العصور
قلوا لبن ماضي صحابك ذي يوفون الكلم=وانته بن الاجواد عالجوده تقدمها جبور