مبعد مرادي والمخيله مبعده=لكن راعدها يدم راس القنيف
يحطى من البارح نواحي محمده=والنزل ماندري قوي والا خفيف
ومن سالته ما يرد المفرده=ولا يخبر ايش لي حاصل بصيف
يقولو ان مسعود ظالم مسعده=ما طاعو ايسدو يظلو ديف ديف
وهي عليه اليوم تنفر محقده=وتقول مبغيته ابا عبد اللطيف
لي كنت في زامه بكل شي معنقده=بالقرط والخشفه وبالثوب النظيف
وكان له هيبه ومن زل يطرده=ولا يداني القطب في السوم الرهيف
وفيه عزة نفس كلن يحسده=وكان قاسي جم لكنه شريف
حتى مع الجيران كل شي جمده=ماطاع يتنازل عن امات الخريف
وان حد لقاله شعر شعره يكرده=وان حد تقبعس تو لطمله في الصنيف
والعدل بين ابناه اول مقصده=ما تعرف الضابط من الليهو عريف
ما هو كما يسلم تركني مجرده=بين الكلاب السود في الشعب المخيف
وفتح البيبان ليهي مؤصده=كل من بغى شي لقاه في نخل الكريف
وابن عمه لي ربي عالعربده=سيطر في النخله على كربها وليف
واشوار اهل الدار ما هي موحده=ما منهم واحد على الثاني كليف
ما ريضو البراد فوق المركده=والظلم حل بالضيف في دار المضيف
وبداء يسن منشار قطعه مبرده=وفي الشجار الخضر بايحسف حسيف
ما با يتمي نيم فوق المنضده=من ثورة المظلوم لطفك يالطيف
وحسب ظني والامور مؤكده=ان السبب يسلم وموقفه الضعيف