هديتك مقابل ((الغيبه)) ,,,!!

[ابونورا]

	بينما كان أحد السلف الصالح يدلف خارجا من المسجد لحق به أحد المصلين وهوا يقول : ايها الشيخ الجليل فلان بن فلان يغتابك ويقول فيك كذا وكذا فغضب الشيخ من الرجل وامره ان يمتنع عن نقل الكلام وغيبة الناس وأنصرف للسوق بعد ساعة من الزمان طرق الشيخ على باب الرجل الذي ذكره بالسوء في المسجد قال الرجل : اهلا ايها الامام كيف أخدمك قال له الشيخ: هذه هدية لك أحضرتها خصيصا لك من السوق فأندهش الرجل من تصرف الشيخ وسأله :ماسبب الهديه فأجابه الشيخ الجليل :لقد أعطيتني هدية أعظم من هديتي لك يارجل زادت دهشة الرجل قائلا :اي هديه أجابه الشيخ : الم تغتابني بالمسجد وتقول عني كذا وكذا فأنت قد أهديتني حسناتك وانا ضنين بحسناتي فلا استطيع ان اهديك كما اهديتني ولكن اشتريت لك بعض الفاكهة نظير غيبتك لي وحسناتك التي باتت من نصيبي وكلما أغتبتني سأحضر لك هدية مماثله وأنصرف الشيخ وترك الرجل مصعوقا من كلماته , وقد فهم الدرس جيدا , سبحان لله ااغتابه ويهديني لذيذ الفاكهة ويعدني بالمزيد لو اكثرت من غيبته وقد هدى الله الرجل الي الحق وكف عن غيبة اخوانه المسلمين

[روح زايد]

الله الله فعلا استفدنا درس اليوم جزاك الله الف خير وبارك الله فيك

[ابونورا]

	خرج الرجال من المسجد واجتمعوا بخارجه ابو احمد وابوسعيد وابوحسن وابو علي قال ابو احمد : شفتوا اش سوا القحطاني ؟؟ قالوا : لا خير اش صار؟ قال ابواحمد : لقيته امس بالبنك ومسويله حساب ربوي وهو قاعد يتفلسف علينا حرام وحلال ضج الجماعه وضحكوا وقال بو حسن : اصلا انا من يوم شفت ثوبه القصير غسلت يدي منه ولاترتجون ياجماعه من المطوع خير ههههههه قال بو سعيد : وازيدكم من الشعر بيت : الرجال يسوي صبغه ولحيته مل التيس الاجرب ههههههه ضحكوا كلهم وابو علي فرط في نفسه بغي يطيح من الضحك : بس بس ياجماعه شفوا جارنا ابو عبدالله جاي نحونا (سالمين كل تمر) ابوعبدالله :السلام عليكم ورحمة الله وبركاته ياجماعه الجميع رد : وعليكم السلام يابوعبدالله اهلا وسهلا فيك ابوعبدالله : بكرة العشاء عندي بالبيت حياكم وترى الاعذار غير مقبوله الجميع : خير اش المناسبه يابوعبدالله ابوعبدالله : بكره تعرفون استاذن بو عبدالله ومشي في طريقه اليوم التاني الجماعه يطرقون باب بو عبدالله : طق طق طق ابوعبدالله يفتح الباب مبتسم : يامرحبا الفا باللي جاء تفضلوا تفضلوا الجميع الله مير يحييك يابوعبدالله ودخلوا وبعدما جلسوا في المجلس وتقهوا الرجال شوي بوعبدالله يقول للربع : حياكم يارجال العشاء تفضلوا قام الجميع وجلسوا عالسفره ورفع بو عبدالله الغطاء عن الصحن الكبير ويتفاجأ الجميع بكمية لحم رهيبه عالصحن وكل واحد يقول واش هالكرم يابوعبدالله قال بوعبدالله من جود الله تفضلوا بدأ الشباب ياكلون ويفترسون هالعشوه الفاخره وابو عبدالله يباشر عليهم وماقعد ياكل والجميع يقولون : استرح يابوعبدالله تفضل اتعش وابوعبدالله يعتذر: لا العفو مقدراكل هاللحم ؟؟ رد الشباب خير ليش ماتقدر اقعد يارجل , الا ماقلت لنا واش المناسبه قال بوعبدالله: مافي مناسبه ولاشئ يالربع , بس امس كنت بالبر مع الحلال والبعارين وقال الراعي انه عندنا بعير مريض وشكله بيموت مافيه رجا قلت له خير خير انشاء الله بكره يصير خير بالمساء اتصل علي قبل لا اشوفكم وقال لي البعير مات بحرقه قلت له : لا لا لاتحرقه خله بكره بدبره وشفتكم قدامي قلت خل اعزم الشباب علي البعير اصلا هوا ميت ميت بدل نرميه للكلاب تاكلونه انت اولى من الكلاب نفض الشباب ايدينهم وبدأ الدم يفور في رؤسهم بوعلي : انت صاحي يالنذل تقلطنا على بعير ميت وقد كان مريض ماتستحي انت بوحسن: ياوسخ ياوغد والله لولا اني ببيتك كان ذبحتك بو احمد مصدوم: الان من جدك انت والله لاشتيك للشرطه يامجرم انت ماتخاف الله تخلينا ناكل هالخياسه والمرض؟ ابو سعيد : والله لافضحك بالحي كله واوريك اشلون تتعامل مع الرجال بسيطه يابوعبدالله قال بوعبدالله : يالربع اسكتوا الله يهديكم واشفيه البعير الميت خير انشاء الله ؟؟ ابو علي منفعل وهجم هلي بوعبدالله : انت اش تقول يا ,,,,,,,,,,,,,,,,,,,,,,,,,,,,,,!! الجماعه مسكوا بوعلي يهدونه : اصبر أنت الشرطه تشوف السالفه الان اتصل بهم ضحك بوعبدالله وقال : على هونكم ياجماعه ترى القعود سليم ولا فيه شئ ابد نظر الجميع له اش تقول انت تكذب او اشفيك يارجال قال بوعبدالله : عصبتم لاني قلطتكم علي قعود ميت ومريض وانتم 24 ساعه تاكلون بلحم جارنا الطيب القحطاني وتغتابونه وعرض الرجل المسلم وغيبته اكره عندالله من اكل لحم الرجل الميت !! هنا سكت الجميع !! ناظروا لبعض وكل واحد اهتز من داخله , وقاموا يتعذرون يابوعبدالله بس حنا ماكذبنا هو عنده حساب بالبنك ووو!! بوعبدالله: اسكتوا يارجال كافي عن أبى هريرة قال قال رسول الله صلى الله عليه وسلم : أتدرون ما الغيبة؟ قالوا : اللهُ ورسوله أعلم ، قال : ذكرك أخاك بما يكره ، قيل : أفرأيت إن كان فى أخى ما أقول ؟ قال : إن كان فيه ما تقول فقد اغتبته ، وإن لم يكن فيه ما تقول فقد بهته رواه مسلم وأنتم يارجال لو صدق كلامكم فيه كنتم واقعين بالغيبه , ولو بهتموه فعقابكم اكبر واشد !! هنا قال الرجال : صدقت بوعبدالله وجزاك الله عنا الف خير واشهد انا تايبين من الغيبه والحين رايحين بيت القحطاني نعتذر منه عسى الله يقبل منا العذر وهذي نصيحتي لكم جميعا وخاصه النساء لكثرة الغيبه والنميمه فيهم , رغم ان بعض الرجال صار أكثر نميمه وغيبة من النساء ونسأل الله الصلاح للجميع

[الصمصومة]

عن أبى هريرة قال قال رسول الله صلى الله عليه وسلم : أتدرون ما الغيبة؟ قالوا : اللهُ ورسوله أعلم ، قال : ذكرك أخاك بما يكره ، قيل : أفرأيت إن كان فى أخى ما أقول ؟ قال : إن كان فيه ما تقول فقد اغتبته ، وإن لم يكن فيه ما تقول فقد بهته رواه مسلم
الله يغفر لنا
غيبه اربعه وعشرين ساعه
ما تسكت لسنا الا عند النوم وخصوصا نحنا يالحريم

[ابونورا]

اقتباس : المشاركة الأصلية كتبت بواسطة الصمصومة [ مشاهدة المشاركة ]

عن أبى هريرة قال قال رسول الله صلى الله عليه وسلم : أتدرون ما الغيبة؟ قالوا : اللهُ ورسوله أعلم ، قال : ذكرك أخاك بما يكره ، قيل : أفرأيت إن كان فى أخى ما أقول ؟ قال : إن كان فيه ما تقول فقد اغتبته ، وإن لم يكن فيه ما تقول فقد بهته رواه مسلم الله يغفر لنا غيبه اربعه وعشرين ساعه ما تسكت لسنا الا عند النوم وخصوصا نحنا يالحريم

	هناك اشباه الرجال الذين يتفوقون على النساء بالغيبة والنميمه والمكر والدهاء فلا تظلمي النساء ياصمصومه