ثار قديم بين باتيس والعمودي (محاوره شعريه )

[طالب النعماني]

سمرة دان في الرياض
بين الشاعر طالب بن حسن باتيس ابوراضي
والشاعر احمد بن عبود بن بدوي العمودي

طالب باتيس

ذا فصل ياعنتر سمر واسرور لبغاء مسمره=لاتعتذرلما تغيب لي الكواكب والنجوم
لانعتذر ياهاجسي سعف الجمال الموشره=وان قد قسمت الفيد شفي لي قسم زايد عالقسوم
والشيخ بن بدوي عطه قسمين شرف محضره=واهل القعيده ذي يحطون الوثن عاكل سوم

احمد بن بدوي

سلام من عندي لكم عدة حروف امسطره=واعداد مايمطر يحن الرعد في برق الغيوم
وارف سلامي عالقعيده بالورود امعطره=من عند بن بدوي حمد اعداد ماتجري العتوم
بلغ سلامي حاني القرنين مولى الوبره=ذي حل في الدمه وجاب الفيد من ارض الحموم

احمد بن بدوي

ايقول بن بدوي تعبناء واقلوب امكدره=جلوا همومي في السمر لا يامجلين الهموم
هت لي خبارك قل لبوراضي وهت في المخيره=لبغاء التراضي بيننا والجبر في الدنيا يدوم

طالب باتيس

ماشي تفاهم بيننا كل البواب امصكره=مادمت تكرهني حذر لا ياضيومي بالضيوم
صاحبك يعذرني وانا وقت الطلب مابعذره=مابعذره لما القيامه قال بوراضي تقوم
مابعذره لما يحط ابليس ذي متحنزره=وايقول بسم الله من كيد العدواه والخصوم

احمد بن بدوي

ماباء يترك ملك اهله في خطوط امحرره=مايعتذر قلوا لبن باتيس في وقت اللزوم
حقه وله عنتر ولد شداد مولى العنتره=ان قد جلستوا بيجلس وان كان قمتوا بيقوم

طالب باتيس

ماشي معه عمله نقيه بايره ومزوره=وصاحب التزوير باتسمع خباره والعلوم
ساعات حن ارعد في سود الليالي المغمره=ماحد رعض سيلي رموا بالمغرفه هي والقدوم
ولعاد شي حيله معك ضاعوا جمال المعصره=وانته تبا تعمل وحليك منكسر فوق السنوم

احمد بن بدوي

عوذ من الشيطان واطلع من مساقي القمره=من قبل ماتجيكم سيول الروس من وادي عطوم
لاضاق حاله بيفصل مابي سكت عالجرجره=ماعذر مايغزي عتيم الليل في ليالي ظلوم
مابي سكت لك وانت ياباتيس ملقي سوكره=لاقد سقيته قار بايسقيك من حر السموم

طالب باتيس

لاقد قبل بالخير بيحصل وجوه المخيره=لاقد ضوى عطشان بالسقيه عاسبعه عتوم
وان قد سقاني مر بسقيه الصبر في الحنجره=بغلب على مالي وباتغلب معي بدوا الصروم
هذا كلام الصدق مادام الحبال امزرزره=كلن يزر حبله وخلوا من ضرب راسه يعوم

احمد بن بدوي

قلوا لطالب لو يقوموا الناس ذي في المقبره=مابا يخلي ملك اهله ذي مرسم بالرسوم
عنده دكاتر بايسوا لك إشاعة قسطره=لاقد فطرت الصبح بيخلوك في المغرب تصوم
باتيس بيقرر ولاهو كل شي بيقرره=ماعذر مايجنب طريق الحاميه ذي في بروم

طالب باتيس

كل من طلع مطلع يفكر ياحمد في مندره=يحسب حسابه قبل مايسعف لشي قصره ولوم
ماشي معه حجه بتيه واضحه في دفتره=هذا كلام الصدق شف بعض الوهوم إلا وهوم
الحمد له والشكر شف عندي شهادة دكتره=دكتور ومنجم وعندي علم تفسير الحلوم

احمد بن بدوي

قلوا لطالب لاتناكر في حقوق امقرره=شف كل شي مكتوب في حطه مرقم بالرقوم
عالروس بيخلوك تدرج من طريق المعبره=ولعاد باتعرف لش بيضيع مابين الريوم
سلم موال الناس ماهو كل حجل بتجدره=من قبل ماتجيكم عواصف ذي تزوع بالحزوم

طالب باتيس

واش بايزوع لك جبل نعمان خل العتوره=ماباتزوع باحمد والله بالحيد الصموم
لاسال سيل الروس يابوشيخ ماباتعبره=مابي عبر صاحبك لاحول بكل وادي عموم
من هو حصونه نايف بين الطهوب المحجره=مابا يخلي الصقر يابو شيخ في جوه يحوم

احمد بن بدوي

لاتقول باعمران حايد هو ياباموكره=بايحضروا حل الطلب في وقت كسار العظوم
عنده صبر قيّر وعلقم مي عبر في الحنجره=ماعذر مايسقيك من قيّر صبر في كل يوم
ماشي معك طيار منته من جيوش الطنقره=تدحق في الوادي تدق القاع وارجولك غسوم

طالب باتيس

العود لعوج ياحمد لاقد ضوى للمنجره=لابد ماعدله رده سهم من جيز السهوم
واسميت لي عربان حلوا في الحناك المغمره=الشيخ بلحمر تكبر عالقبائل بولحوم
وقت الطلب بقفل طريق الميمنه والميسره=لمان تدفع لي الجمارك والضرائب والرسوم

احمد بن بدوي

هبت مهب عليا مخيله والقنوف امثوره=والذري بايلقوه بين الناس من خلته وثوم
مابي هتم منك ولو حتى رجالك مكثره=والشمس لاشرقت على الوادي يردوها غيوم

فصل جديد

احمد بن بدوي

قلوا لبوراضي رفيع المنزله= ذي هو يفسر في رياض الصالحين
البرق والراعد يحن بالمسفله=وارسل بدجله عابلاد الرافدين
واهل العليا في السنين المقبله =ربك بعوضهم على طول السنين

بلخير بن سالم باتيس

الصوت في قلبي قرح كالقنبله=من صوت مغناكم غدا عظمي طحين

طالب باتيس

صبرك صبر مهما تطول المرحله=مابا يخليها بلاد الجنتين
وقتي كلفني عالحمول المثقله=واصبحت مثل الهيج حصحص بالوين
ولعاد بشكي من حياة البهذله=حظي وقسمي منكتب فوق الجبين
ماباك تشكي لي وعندي مشكله=عندي مشاكل ذي تشيب بالجنين

احمد بن بدوي

قلوا لبن سالم ليالي موحله=والناس ماعرفوا طريقي روح فين
حياء وسهلا بالقوافي مرسله=من هيج منيب ذي ينذف بالهين
مايرتصن بالقيد هو والسلسله=يقحص بنابه دوب في شده ولين
واجبال وادي عمد في ملكه وله=وان كان بقعه لايجي حصاها وطين

طالب باتيس

حبش وعزش ياشروع القبوله=يشهد على الله رب العالمين
باب الوفاء والجود مابا قفله=كلمة رضاء عندي كما خزنة بنين
مابتعذر في التاليه والاوله=وقت الطلب بايجيبها دنياء ودين

احمد بن بدوي

ان الهوى والعشق مهو بلبله=يبقى وفا واحسان بين العاشقين
واحفظ بنوده قل لطالب كمله=ولاتهين الشخص منقوش الجبين
حافظ على عزه وعاسمعت هله=وارفعه لاعند النجوم الزاهرين
وان قد طعت الحبل كله وصله=والسر لاتظهره عند الثانيين

طالب باتيس

هذا الكلام الزين كلن يقبله=والسر يبقى سر مخفي مايبين
احلمت واتراييت نوب القرمله=عالشجره العيفه يحن ملقي حنين
والارض تتزلزل ووقت الزلزله=كلن ضوى ينغب بصوت الغافلين
عشرين موشر يعصرون الجلجله=والشيخ متمسك بلحية سالمين

احمد بن بدوي

الركن لسعد قل لطالب قبله=واهل المدينه رحبوا بالزايرين
ومن عمد في الشمس لازم ظلله=وان مابغا إلا الشمس بتجيه الكنين
ذا فصل والثاني ذكرت الزلزله=بيزلزلوبك قل لطالب كل حين
ماباك تشرب من حبوب الانجله=ذي هي تظر القلب مابين الريين

طالب باتيس

صاحبي عاصي ماقراء في البسمله=ماطاع يتعوذ من ابليس اللعين
لابد رده في السمر ماجامله=من قبل مايضيع يسارع واليمين
حبل الوفاء والجود لازم طوله=شفني على سنة رسول المسلمين
وان بايعاندني بشر بالويل له=لابد ماخليه كل قاسي يلين

احمد بن بدوي

واش ذا المدح واش ذا الهروج الموحله=ماباك تتمدح ولاتجيب اليقين
ماعذر ماتجنب طريق المعمله=لما تقع مسلم مثيل المسلمين
يالهيج لو هو طن مابا تنقله= يبغاء مواتر عاصرك تلقي حنين

[عاشق الوادي]

كلام جميل ومميز تشكر عليه اخي ابو راضي والى الامام

[ولــ باعبيد ــد]

صح إلسانك وصح لسانه ولا هنت ولا هانت حروف قصيدك ....


وتسلم خوي عــ الابيات الرايعه ...........


تحياتي : محــ باعبيد ــمد

[مجمل]

كلااااااااااااااااااااااااااااااام ياشباب
قصيد منقح
بارك الله فيكم
دمتم في عز

[الامير23]

تسلموا بو راضي وبن بدوي على الكلمات الرائعه والللي تحوي في مفهومها الكثير والكثر من الابداع وبعد النظر في التفسير
تسلموا جميعكم وصح ألسنتكم

[طالب النعماني]

بارك الله فيكم جميعا
واشكركم على المرور الكريم

[الاصمعي]

[كلام منقح وموزون وله معنى وفن]

[الاصمعي]

السلام عليكم ورحمة الله وبركاته

[عبدالقادر صالح فدعق]

كلام له وزن الذهب من شعراء كبار لهم باع وذراع في هذه الربوع ..

دمتم دومآ مبدعين ومتجددين كما أنتم .

للجميع العافية .

.